VOV4.Bahnar - Mĭnh anih đei jĭ hơ kar lĕch pơ plei tơ̆ kơ pô, rơ mo hlôi đei ƀôh tơ̆ xăh Đăk Djrăng, apŭng Mang Yang, Gia Lai. Mă hơ dăh ‘noh, ‘năr 28/5, đei 19 tŏ rơ mo kơ 12 ŭnh hnam kon pơ lei tơ̆ plei Brếp păng Đê Rơn (xăh Đăk Djrăng, apŭng Mang Yang) đei dôm tơ drong jĭ muh đei đak, lĕch hlak măt, đei lĕch pơ plei tơ̆ kơ̆l, klak, jơ̆ng, hơ ko, yuh 40 độ C păng sa tŏ sĕt. Anih jang găh vei rong kon tơ rong păng Thú y dêh char Gia Lai hlôi iŏk pham gơ̆h kơ anih jang Thú y tơ ring 5 vă hơ len lăng. ‘Năr 31/5, pơ tôch hơ len lăng ăn ƀôh, đei 2 tơ mam jĭ ƀôh ƀlep hăm jĭ hơ kar lĕch pơ plei. Truh kơ sơ̆ ‘năr 1/6, akŏp đĭ đăng kơ sô̆ rơ mo đei jĭ hlôi tŏk hloh 27 tŏ, tơ̆ 20 ŭnh hnam. Khŭl kơ dră tơ ring hlôi tơ băt hơ dăh tơ ring đei jĭ hơ kar lĕch pơ plei tơ̆ kơ pô, rơ mo ‘noh xăh Đak Djrăng; xăh hlôi tơ lĕch hloi rim trong jang kăl vă tang găn jĭ tơ poh lanh, ƀơm ư̆h kơ ‘lơ̆ng truh tơ drong sơ đơ̆ng ăn kon tơ rong.

Tơ drong jĭ tơ̆ kon tơ rong tơ̆ dêh char Kon Tum oei hơ nơ̆ng pơm hiong răm ăn bơ ngai rong. Tơ̆ 2 xăh sơ lam Đăk Nhoong păng Đăk Plô kơ apŭng Đăk Glei dêh char Kon Tum dang ei đei vă jê̆ 200 tŏ kơ pô, rơ mo lôch yoa jĭ pham kơ tuăl. Ƀok A Mon, Phŏ Kơ dră vei lăng kon pơ lei xăh Đăk Plô, apŭng Đăk Glei, dêh char Kon Tum ăn tơ băt, jô̆ truh ‘năr 11 đĭ ‘năr 31/5 tơ̆ 3 pơ lei lơ̆m xăh đei: Đăk Book, Pêng Lang păng Bung Tôn đei 69 tŏ kơ pô, rơ mo lôch, hlôi đei khul kơ dră tơ ring păng kon pơ lei sŏh, ƀŭ hŭt. Tơ drong tơm pơm ăn kơ pô, rơ mo lôch đei anih vei lăng choh jang xa apŭng akhan ‘nŏh yoa jĭ pham kơ tuăl.

Kon pơ lei xăh Đăk Plô dui hor kơ pô lôch vă ƀŭ hŭt

Tơ̆ hơ năp đei lơ kơ pô, rơ mo lôch, khul kơ dră chĕp kơ̆l xăh krao hơ vơn kon pơ lei kron kơ pô, rơ mo lơ̆m hơ drong, lê̆ hơ chăng kư̆ kă, ƀet pơ gang tang găn jĭ mă lei kơ pô, rơ mo lôch oei đei hơ nơ̆ng đĕch. Tơ̆ dêh char Kon Tum jĭ tơ̆ kon tơ rong oei tơ pŏh tôch hơ mơt, pơm hiong răm lơ ăn bơ ngai rong. Dang ei, kŭm hăm anih jĭ pơm ăn vă jê̆ 200 tŏ kơ pô, rơ mo lôch tơ̆ 2 xăh sơ lam Đăk Nhoong păng Đăk Plô kơ apŭng Đăk Glei, Anih vei lăng tơ drong rong kon tơ rong păng jang thŭ y dêh char kŭm ƀôh đei jĭ pơ plei tơ̆ hơ kar rơ mo tơ̆ 3 apŭng: Kon Plông, Sa Thầy păng Ia H’Drai. ‘Ngoăih kơ ‘nŏh jĭ klak nhŭng Châu phi kŭm oei tôch hơ mơt tơ pŏh hơ lơ̆k dơ̆ng.

Thuem hăm Dơ̆ng: Tơ blơ̆