VOV4.Bahnar -  Kơ yuơ đei ƀơm kơnê̆ đơ̆ng tŏ ‘mi kial, ‘long găr sơlơ̆k tơ̆ Gia lai sơnăm au ư̆h kơ gan plei. Pơyan ‘long găr sơlơ̆k ư̆h kơ plei kơtang atŭm hăm khei ‘năr kơ jă re kơtang, pơm ăn kon pơlei jang pơtăm ‘long găr sơlơ̆k hiong răm tôch kơtang.  

Kon pơlei tơring Ia Khai, apŭng Ia Grai, dêh char Gia Lai phĕ dônh plei ‘long găr sơlơ̆k.

‘Năr dơ̆ng tŏ hlơ hlĕng, ŭnh hnam mŏ Rchăm Thu, oei tơ̆ pơlei Krăi, tơring Ia Grai, dêh char Gia Lai atŭm hăm mĭnh ƀar ‘nu kŏng nhân tŏk bŏk chă phĕ plei ‘long găr sơlơ̆k. Mŏ Thu tơbăt, sơnăm sơ̆ ŭnh hnam jang sa iŏk đei 100 trĭu hlak jên đơ̆ng 3 ha ‘long găr sơlơ̆k, mă lei sơnăm au rŏ năng lăp iŏk đei mĭnh poăt kơ yuơ sơdrông pơrăm tôch kơtang lơ̆m khei ‘năr dơnơm ‘long kơtăn plei, pơm ăn ư̆h kơ đei plei:“Sơnăm au, tơdăh ư̆h kơ đei sơdrông pơrăm lei plei trem dêh, kơ yuơ hăp chô̆h pơkao tôch kơ lơ. Mă lei ăp kăl chă prôi phŏng, pruih pơgang pơlôch sơdrông mă tôm vă vei lăng năng tông đei plei kơtăn. Tơdăh đei pơgang sơdrông măh mai, kăt bơ̆n sơdrai sơdrông pơrăm păng dôm sơdrai ư̆h kơ ‘lơ̆ng ‘nŏh kŏh hŭt hloi vă hoei tơpŏh tơ̆ hơnai lei ‘lơ̆ng ƀiơ̆. Hrei au kon pơlei vei lăng tôch mơmat tat, hơpơi tĕh đak chă tơgum djru vă trong tang găn sơdrông pơrăm”

Jei oei lơ̆m tơring Ia Khai, ŭnh hnam ƀok Ksor Huôn jei tŏk bŏk hơngŭr phĕ plei ‘long găr sơlơ̆k 3 ha. Ƀok Huôn tơbăt, kơ yuơ sơdrông pơrăm kơtang, găr ‘long găr sơlơ̆k iĕ-kơnê̆ tê̆ kơna tĕch jei ư̆h kơbăt. Đơ̆ng blŭng pơyan trŭh dang ei, ŭnh hnam lăp tĕch đei đơ̆ng 22 trŭh 25.000 hlak jên lơ̆m 1 kĭ, lơ̆m mă sơnăm sơ̆ jô̆ hơtŏ ‘nŏh 30.000 hlak jên lơ̆m 1 kĭ. “Sơnăm au ư̆h kơ plei dơ̆ng păng kơ jă re dơ̆ng pơtêng hăm sơnăm sơ̆, nhôn hơpơi ‘mĕh vă tĕh đak hơnơ̆ng lăng ba hlŏh dơ̆ng truh chŏh jang sa vă kon pơlei sơđơ̆ng jang sa, erĭh sa”

Pơyan găr sơlơ̆k sơnăm au rŏ năng tŏ sĕt hlŏh sơnăm 2020.

‘Long găr sơlơ̆k ư̆h kơ plei, kon pơlei hiong răm kơ, bơngai răt jei ư̆h kơ đei tơmam vă tĕch. Yă Phạm Thị Thúy, mĭnh ‘nu bơngai joăt chă răt akŏm găr ‘long găr sơlơ̆k lơ̆m apŭng Ia Grai tơbăt:“Sơnăm au plei hăp ư̆h kơ ‘lơ̆ng kơ yuơ ‘mi hơdrơ̆k pơyan păng sơdrông, ngom ƀŏh pơrăm, plei ư̆h kơ ‘lơ̆ng, chă răt tŏ sĕt hlŏh sơnăm sơ̆, kơ jă jei tơ jur, rim sơnăm hơdrol au ki trŭh pơyan lơ̆m 1 năr răt akŏm đei trŭh jĭt dôm tân hloi, sơnăm au tŏ sĕt hlŏh 3 ‘măng pơtêng hăm sơnăm sơ̆”

Kiơ̆ đơ̆ng yă Nguyễn Thị Mai Lương, Kơdră chĕp pơgơ̆r Dơnŏ anĭh vei lăng kon pơlei tơring Ia Khai, jing tơring pơtăm ‘long gar sơlơ̆k să hlŏh lơ̆m apŭng Ia Grai hăm hlŏh 1000 ha. Dôm sơnăm au ki, ‘long găr sơlơ̆k jing ‘lơ̆ng, plei ăl hlôi tơgŭm ăn kon pơlei jang sa iŏk yua kơ jăp. Mă lei, tơ̆ hơnăp tơpĭh tŏ ‘mi kial hrei au, bơngai pơtăm ‘long găr sơlơ̆k jang sa ư̆h kơ lĕch. Tơdrong mă au kăl đei trong jang ‘lơ̆ng hơ iă hlŏh dơ̆ng hăm kơ loăi ‘long pơtăm tơm dơnơm xut xa pơngot rơvĕt tơjur dơnŭh tơ̆ tơring:“ Bơ̆ jang tơjur dơnŭh tơ̆ tơring  nhôn gơnơm đơ̆ng ‘long găr sơlơ̆k tôch kơ lơ, jei hơpơi kơdră kơpal đei lơ trong jang ‘nao, lăng ba kơtang hlŏh dơ̆ng trŭh jang pơtăm ‘long găr sơlơ̆k, hơpơi ‘mĕh vă đei jing tơmam drăm OCOP vă sơkơt hơdăh tơmam drăm plei găr sơlơ̆k kơ tơring Ia Khai”./.

Bơngai chĭh: Hoàng Qui

Tơblơ̆ nơ̆r: Amazưt