VOV4.Bahnar - Mă đơ̆ng ‘nao tơlĕch jang, mă lei trong jang rong jĭl iŏk rơnôp păng chông kon tơ̆ apŭng Mang Yang, dêh char Gia Lai hlôi hơnhăki đei iŏk yua kơ jăp. Trong jang au oei tơgum ăn kon pơlei, mă kăl hăm ŭnh hnam kon kông tơplĭh trong jang sa vă atŏk tơ iung mŭk drăm păng sơđơ̆ng erĭh sa.

Trong jang rong jĭl tơ̆ apŭng Mang Yang, dêh char Gia Lai

Ƀok Vũ Văn Dân, oei lơ̆m koeng kơphô̆ 4, thĭ trân Kon Tơ̆ng ‘nŏh mĭnh lơ̆m dôm ŭnh hnam đei apŭng Mang yang, dêh char Gia Lai tơgŭm djru rong jĭl. Ƀok Dân tơbăt, ƀok đei ƀơk ăn 2 tŏ jĭl bŏng păng jĭl yŏng đơ̆ng khei 6 sơnăm sơ̆ vă rong.  Đei kang ƀô̆ chă pơtho atŭm hăm hŏk pơhrăm lơ̆m khei ‘năr vei lăng năng tông, trŭh dang ei jĭl tĭh vơ̆ ‘lơ̆ng, jĭl hlôi chông kon păng iŏk rơnôp ‘măng mă blŭng.“ Rong hiĕm jĭl jei ƀônh, hăp sa ‘ngiĕt jơ̆ng rôih, hla mit, hla hơra hăp sa ngăl. Lơ̆m pơgê lăp tơ hiong mĭnh poăt pơnĭt jơ chă hiĕm hăp. Găh pơyan ‘mi ‘ngiĕt jing ‘lơ̆ng ‘nŏh lăp tơhoach 10 pơnĭt jơ kăt ‘ngiĕt ăn kơ hăp sa. Găh lơ̆m mă hăp chăt rơnôp bơ̆n hiĕm dơ̆ng prit, hơ ƀo, ƀum vă kơ rơnôp hăp ‘lơ̆ng. Ba jei ‘mĕh vă pơ̆ih să chă rong vă iŏk đei sơđơ̆ng ăn ŭnh hnam”

Mă đơ̆ng ‘nao tơlĕch jang, mă lei rim ŭnh hnam hlôi kăt tĕch đei rơnôp jil păng đei kon jil. Ŭnh hnam ‘nhŏng Nông Văn Đạo, oei lơ̆m pơlei Đe Bơ Tưk, tơring Đăk Jơ Ta, apŭng Mang Yang ‘nŏh jĭ mĭnh ŭnh hnam jang sa đei. Kiơ̆ đơ̆ng ‘nhŏng Đạo, sơ̆ ŭnh hnam rong pơbe, rơmo mă lei kon tơrong ngăl đei jĭ, tĕch mơdro ư̆h sơđơ̆ng. ‘Nhŏng Đạo hơlen rong jĭl ‘măng mă blŭng hơnhăk đei iŏk yua kơ jăp, lăp hăm tơdrong trong rong kon tơrong kơ kon pơlei, mă kăl lơ̆m tơring kon kông păng gô pơjing đei jang sa iŏk yua kơ jăp đunh đai tai sơnăm ăn kon pơlei, sơđơ̆ng erĭh sa. “ Ŭnh hnam bơnê kơ Tĕh đak lăng ba hơnhăk trong jang rong jĭl au ăn kơ kon pơlei nhôn. Ba ƀô̆h rong jĭl au iŏk yua tôch kơ jăp, nhen ŭnh hnam ba au rong đei 1 sơnăm kơ au hlôi kăt tĕch đei 2 ‘măng rơnôp hăp păng hăp chông đei 1 tŏ kon bơih. Ba ƀô̆h trong jang au tôch hơ iă păng ĭnh ‘mĕh lang să chă rong lơ hlŏh dơ̆ng vă kon pơlei năm hŏk pơhrăm păng pơm kiơ̆”.

Ƀok Trần Nam Danh, Kơdră chĕp pơgơ̆r Hơnĭh vei lăng jang Mŭk drăm-Trong hnam apŭng Mang Yang, dêh char Gia Lai tơbăt, trong jang rong jĭl đei tơlĕch jang đơ̆ng kon jên jang khoa hŏk kmăi kmŏk kơ apŭng păng mĭnh păh đơ̆ng kơ dĭh kon pơlei. Hăm 5 ŭnh hnam tơnap tap hlŏh đei tơgŭm djru, ‘măng mă blŭng hlôi iŏk yua kơ jăp, tơgŭm ăn kon pơlei đei tơdrong jang sa păng hơnhăk đei erĭh sa sơđơ̆ng đơ̆ng rong jĭl au. “Mư̆h jang kiơ̆ tơdrong jang au ‘nŏh nhôn jei hlôi jang hơdoi hăm hơp tak xah vă mư̆h đei rơnôp jĭl ‘nŏh răt iŏk đơ̆ng kon pơlei vă kon pơlei sơđơ̆ng. Păng lơ̆m khei năr au ki ‘nŏh kon pơlei hlôi jang kiơ̆ trong jang au đei iŏk yua kơ jăp kơna kon pơlei tôch chhôk ‘nă păng athei pơ̆ih să jang kiơ̆ trong jang au roi năr roi atŏk tơ iung lơ̆m apŭng”.

Hăm đei iŏk yua ‘măng mă blŭng đơ̆ng rong jil iŏk rơnôp păng chông kon hơnhăk ăn hlôi tơgŭm ăn kon pơlei apŭng Mang Yang tơplĭh trong jang sa, mă kăl ‘nŏh tơring kon kông. Đơ̆ng nŏh tơgop atŏk kơtang xut xa pơngot rơvĕt tơ jur dơnŭh tơ̆ mĭnh apŭng mă tơdrong erĭh sa kơ kon pơlei oei đei lơ tơnap tap nhen apŭng Mang Yang, dêh char Gia Lai.

Bơngai chĭh: Hoàng Qui

Tơblơ̆ nơ̆r: Amazưt