VOV4.Bahnar - Atŭm hăm jơhnơ̆m đon chhôk hơ iă ‘nă hal kơ yuơ tang găn kĕ jĭ Covid-19, dôm năr au, kon pơlei choh jang sa rim apŭng găh pơbăh dêh char Gia Lai tŏk bŏk chơt hơ iă kơ yuơ tơmam drăm chŏh jang sa đei iŏk yua kơ jăp păng kơ jă tĕch mơdro măt hlŏh sơnăm sơ̆.

Bơngai pơtăm pơkai rŏ năng iŏk đei 300 trĭu hlak jên lơ̆m 1 ha

Vă jê̆ mơjĭt sơnăm pơtăm pơkai tơ̆ tơring Chư̆ Gu, apŭng Krông Pa, dêh char Gia Lai, ‘nau pơyan blŭng a ŭnh hnam ƀok Huỳnh Thanh Táo tĕch đei kơ jă 9.000 hlak jên lơ̆m 1 kĭ pơkai kơtă tơ̆ chŭn hloi. Hăm 1 ha pơkai, chă jang sa tim mă kơtĕch 3 khei, ŭnh hnam ƀok phĕ iŏk đei 50 tân pơkai, tĕch mơdro iŏk đei vă jê̆ 300 trĭu hlak jên. Ƀok Huỳnh Thanh Táo tơbăt, hăm dôm ŭnh hnam pơtăm đei plei pơkai tĭh, ‘lơ̆ng, kơ jă 14.000 hlak jên lơ̆m 1 kĭ kơ loăi 1, ‘nŏh oei đei iŏk yua lơ hlŏh dơ̆ng. Jang sa iŏk đei kơ jăp au gơnơm pơrang jĭ hơbŭh Covid-19 tơ̆ tơring đei tang găn kĕ, tơmam drăm đei tĕch mơdro sơđơ̆ng:“Ŭnh hnam bơ̆n chơt hơ iă dêh păng mư̆h trŭh năr phĕ ‘nŏh kơdră tơring pơjing rơvơn ăn khŭl mơdro chă răt hiôk hian; gơnơm đơ̆ng nŏh kơna ba mă tĕch hlot tơmam drăm.”

Atŭm hăm lơ̆m jơ ‘năr au, kon pơlei tơring pơtăm kơtao tơ̆ rim thĭ xah Ayun Pa, thĭ xah An Khê păng apŭng Chư Sê, dêh char Gia Lai jei chơt hơ iă ‘nă hal pơyan jang sa đei, kơ jă măt. Ƀok Bùi Văn Cường, Kơdră Khŭl jang kơtao tơring H’bông, apŭng Chư Sê, tơbăt, sơnăm au kơtao jing ‘lơ̆ng lơ̆m 1 ha kŏh iŏk đei 80 tân, hăm kơ jă 900.000 hlak jên, đơ̆ng rŏng tơklăh pơ đĭ kon jên tơmơ̆t jang, lơ̆m 1 ha kon pơlei oei iŏk đei 50 trĭu hlak jên. Atŭm hăm pơyan đei iŏk yua kơ jăp păng kơ jă măt, kon pơlei pơtăm kơtao tơ̆ Gia Lai jei tôch rơvơn lơ̆m tơdrong kŏh tĕch:“Sơnăm au ‘mi rŏ tŏ hơlăng, kơtao hoei chă tơgơ̆, kơ liĕt kơ yuơ kial hơbŭt hơbông pơrăm, hăm kơtao, sơnăm au pă đei tơtăm vă tơchă đe kŏh pơdŭ kơ yuơ hnam kmăi hlôi đei khŭl chă kŏh pơdŭ.”

Kơjă pơkai tơ̆ chŭn mir tơ̆ Gia Lai hrei au dang 9.000 hlak jên lơ̆m 1 kĭ

‘Ngoăih kơtao, pia, ‘nŏh kơ jă ƀum ƀlang hơdrih pơyan au jei tŏk bŏk đei đe răt iŏk hăm kơ jă 3.000 hlak jên lơ̆m 1 kĭ, măt hlŏh 3 ‘măng pơtêng hăm pơyan hơdrol. Atŭm hăm ‘nŏh, tơplĭh ăn mơng gre đe chơ ƀum ƀlang năm trŭh tơ̆ Kŏng ty, sơnăm au bơngai mơdro hlôi năm trŭh tơ̆ mir răt iŏk hăm kơ jă đơ̆ng 30 trŭh 35 trĭu hlak jên lơ̆m 1 ha. Yă Hoàng Thị Chanh (60 sơnăm) bơngai pơtăm ƀum ƀlang oei tơ̆ thôn Mê Linh, tơring Chư Rcăm, apŭng Krông Pa, tơbăt:“Ĭnh pơtăm 2 ha ‘noh tĕch đei 60 trĭu hlak jên. Jô̆ hơtŏ lơ̆m 1 ha rô̆ iŏk đei đơ̆ng 15 trŭh 17 tân trŭh 20 tân, tơdăh ƀum hoei pơgang lei lơ̆m 1 ha đei trŭh 30 tân. Jơ ‘năr vei lăng năng tông ƀum ƀlang ư̆h kơ măh lơ mă lei  đei iŏk yua sơđơ̆ng hlŏh pơtêng hăm ‘long pơtăm anai”.

Lơ̆m khei 2/2021, mĭnh ƀar apŭng găh pơbăh dêh char Gia Lai nhen Ia Pa, Krông Pa, Thĭ xah Ayun Pa đei tơdrong jĭ hơbŭh Covid-19. Tơring măh jang kiơ̆ ,oei hơtăih dĭh băl vă tang găn pơrang jĭ. Dơnŏ anĭh vei lăng kon pơlei dêh char Gia Lai hlôi tĕnh koăng pơrô̆ athei rim hơnĭh bơ̆ jang, tơring tơrang tơlĕch rim trong jang pơm sơđơ̆ng ăn kon pơlei chă kŏh rô̆ tơmam drăm jang sa păng tĕch mơdro. Kiơ̆ kơ ‘nŏh, hơnĭh vei lăng chŏh jang sa, hơnĭh jang vei lăng mơdro sa adoi nhen rim hnam kmăi ot ƀum ƀlang, hnam kmăi rŏr kơtao pơm sĭk tơ̆ Gia Lai đei trong iung jang năm răt iŏk, pơm tơlĕch, tĕch mơdro tơmam drăm, mă kăl lơ̆m tơring đei pơrang jĭ hơbŭh Covid-19; dơnŏ anĭh bơ̆ jang vei lăng trong nơnăm sơđơ̆ng ‘lơ̆ng hơ iă ăn bơngai păng gre chơ choĕn tơmam drăm mơ̆t lĕch lơ̆m tơring đei pơrang jĭ. Ƀok Đinh Xuân Duyên, Kơdră chĕp pơgơ̆r Dơnŏ anĭh vei lăng Chŏh jang sa păng Atŏk tơ iung tơring tơrang apŭng Krông Pa tơbăt, gơnơm đơ̆ng nŏh kơna tơring mă jang kiơ̆ ‘lơ̆ng tơdrong jang tingring ‘nŏh chŏh jang sa răh, tĕch mơdro răh adoi iung jang hloi tang găn kĕ jĭ hơbŭh Covid-19:“Tơ̆ hơnăp tơdrong jĭ hơbŭh Covid-19 ‘nŏh Dơno anĭh chĕp pơgơ̆r tang găn jĭ apŭng hlôi pơrô̆ athei Dơnŏ anĭh vei lăng kon pơlei rim tơring vei lăng kơ jăp khŭl bơngai jang năm phĕ pơkai. Kon pơlei trŭh ‘nŏh nhôn jei pơjing rơvơn hơ iă păng mư̆h jang ‘nŏh pơm kiơ̆ 5 tơdrong kăl; pơtih gia nhen tơbăt hơdăh găh jơhngơ̆m jăn, ư̆h kơ oei akŏm lơ bơngai păng pơm kiơ̆ trong sơđơ̆ng jang sa kơ kon pơlei păng vei lăng sơđơ̆ng jang tang găn jĭ Covid-19.”

Kơ jă kơtao tơ̆ Gia Lai ‘nŏh 900.000 hlak jên lơ̆m 1 tân, tŏk 100.000 hlak jên pơtêng hăm sơnăm sơ̆

Lơ̆m giĕng au ki, đei dơ̆ng tơdrong chơt hơ iă ‘nŏh kơ jă tiu hơnơ̆ng tŏk măt đơ̆ng 60.000 hlak jên tŏk trŭh 70.000 hlak jên lơ̆m 1 kĭ. ‘Nau kơ jă măt hlŏh lơ̆m 4 sơnăm năm tơ̆ au. Tơdrong au tơgŭm ăn kon pơlei tơring jang tiu kơ Gia Lai jang sa iŏk yua kơ jăp hlŏh. Ƀok Nguyễn Đình Thuỷ (thôn 4, tơring Ia Hlôp, apŭng Chư Sê) ‘nao hơvơ̆h đe phĕ pơgar tiu 1ha 5 sao vă tĕnh koăng sơkơ̆t hơdăh tơdrong iŏk đei. Ƀok Thuỷ tơbăt, kơ yuơ sơnăm 2017 trŭh dang ei, kơ jă tiu tơjur kơtang đơ̆ng hlŏh 200.000 hlak jên jur trŭh 35.000 hlak jên lơ̆m 1 kĭ, hmă hmă ŭnh hnam chă phĕ kơ dĭh vă dă ƀiơ̆ tơhoach kon jên hơvơ̆h. Găh pơyan au, ‘nao lăp trŭh khei ‘năr phĕ, tiu hlôi tŏk kơ jă trŭh 69.000 hlak jên lơ̆m 1 kĭ ƀơ̆t tŏk bŏk khei 3. Hăm phĕ iŏk đei 3 tân plei hơdrĭh, tơklăh 60 trĭu hlak jên tơmơ̆t jang păng ăn kơ đe phĕ, ŭnh hnam ƀok Thuỷ oei iŏk đei 150 trĭu hlak jên:“Mĭnh ƀả sơnăm kơ au, kơ jă tiu re, bơngai jang iŏk ư̆h kơ tôm kon jên tơmơt jang, phăh prang pơgar ‘nŏh lơ pơgar tiu lôch rơ ông rơ ang. Ĭnh năm chă hŏk pơhrăm, đei chă pơtho ăn trong vei lăng năng tông hăm sinh hŏk, lăng ƀô̆h pơgar tiu đei jing ‘lơ̆ng ƀiơ̆, plei ăl ƀiơ̆. Tơklăh pơđĭ kon jên tơmơ̆t jang ‘nŏh lơ̆m 1 ha rŏ năng iŏk đei 150 trĭu hlak jên.”

         Tơmam drăm chŏh jang sa đei iŏk yua kơ jăp, kơ jă măt hlôi tơgŭm ăn kon pơlei Gia Lai dă ƀiơ̆ tơnap tap lơ̆m khei ‘năr iung jang tang găn jĭ jăn; adoi pơjing rơvơn ăn tơmơ̆t jên jang, chŏh jang sa lơ̆m pơyan đơ̆ng rŏng.

Bơngai chĭh: Nguyễn Thảo

Tơblơ̆ nơ̆r: Amazưt