VOV4.Bahnar - Khei năr tơ jê̆ au, atŭm lơ̆m tĕh đak, mĭnh ƀar dêh char lơ̆m tơring Tây Nguyên hlôi đei ƀô̆h lơ tơring đei jĭ pơ ‘ngĕh akar tơ̆ kơpô rơmo. Hrei au, hơnĭh bơ̆ jang pơgang vei lăng kon tơrong, kơdră tơring păng kon pơlei đei kon tơrong jĭ tŏk bŏk tơlĕch jang rim trong jang kơtang vă dă ƀiơ̆ jĭ tơpĭh lang să vă vei lăng sơđơ̆ng ăn kon tơrong.

Mĭnh tŏ rơmo jĭ pơ ‘ngĕh akar tơ̆ apŭng Kon Plông, Kon Tum.

Kiơ̆ kơtơ̆ng ang đơ̆ng Hơnĭh vei lăng Rong kon tơrong păng Jang pơgang vei lăng kon tơrong dêh char Kon Tum, tơring đei jĭ pơ ‘ngĕh akar đei ƀô̆h hrôih hlŏh lơ̆m tŏk bŏk khei 5 au ki tơ̆ dôm ŭnh hnam kon pơlei kơ pơlei Điek Tem, tơring Ngọc Tem, apŭng Kon Plông hăm 3 tŏ rơmo jĭ. Đơ̆ng rŏng ‘nŏh dang 10 năr, hơnĭh bơ̆ jang pơgang vei lăng kon tơrong hơnơ̆ng đei ƀô̆h 2 hơnĭh jĭ hăm 2 tŏ rơmo jĭ tơ̆ pơlei Răk, tơring Ia Xiêr, apŭng Sa THây păng thôn 3, tơring Ia Dom, apŭng Ia H’Drai. Lăp đơ̆ng rŏng đei ƀô̆h dôm hơnĭh đei jĭ, Hơnĭh vei lăng rong kon tơrong păng jang Pơgang hlôi pơlôch hŭt 5 tŏ rơmo jĭ, adoi bơ̆ jang vei lăng năng tông kơ jăp tơring đei jĭ. Mă lei hăm akŏp đei 105.000 tŏ kơpô, rơmo, adoi tim mă đei ƀet pơgang vaccine bơ̆ng jĭ, tơdrong hơmơt tơpŏh jĭ pơ ‘ngĕh akar kơpô rơmo tơ̆ dêh char Kon Tum tôch kơtang. Ƀok Hà Thanh Lâm, Kơdră chĕp pơgơ̆r Hơnĭh bơ̆ jang vei lăng jĭ găh Anĭh vei lăng Rong kon tơrong păng Jang pơgang dêh char Kon Tum tơbăt: “Hăm tơring tŏk bŏk đei jĭ ‘nŏh kang ƀô̆ joăt jang kơ Hơnĭh bơ̆ jang au hlôi jang hơdoi hăm kang ƀô̆ joăt jang kơ Hơnĭh vei lăng Chŏh jang sa păng khŭl kơdră tơring đei tơdrong jĭ pơtho tơbăt ăn kon pơlei băt đei tơdrong jĭ pơrăm lơ̆m pơlei bơ̆n, tơring bơ̆n păng rim trong jang kiơ̆ tơdrong tơchơ̆t. ‘Nŏh pơ ‘ngoăih rơgŏh trong cham,choong hium ‘ngiĕt, kôch pơ ‘ngoăih hơboong thoong đak, hơlŏng đak vă dă ƀiơ̆ đei bơ̆n mŭr măih roi au to oei. Đơ̆ng rŏng ‘nŏh pruih pơgang pơlôch mŭr măih hơngĕnh păng pơtho ăn kon pơlei vei lăng năng tông kơ jăp kon tơrong bơ̆n”

Kang ƀô̆ jang pơgang vei lăng kon tơrong dêh char Gia Lai khăm hơlen ăn kon tơrong

Tơ̆ Gia Lai, dêh char tơtil hăm dêh char Kon Tum, lơ̆m dôm năr au ki hlôi đei ƀô̆h 4 hơnĭh đei jĭ pơ ‘ngĕh akar kơpô, rơmo tơ̆ 3 apŭng păng tŏk bŏk tơpŏh lang să. ‘Nhŏng Đơng, oei tơ̆ pơlei Brêp ‘nŏh 1 lơ̆m dôm ŭnh hnam mă blŭng tơ̆ tơring Đak Djrăng, apŭng Mang Yang, dêh char Gia Lai đei rơmo jĭ pơ ‘ngĕh akar. Năr 27/5, ƀô̆h 4 lơ̆m 20 tŏ rơmo ŭnh hnam đei đak hai, đak măt ro, tơ̆ akau pơ ‘ngĕh tơblêu tơblao, mă lei ư̆h kơ tom ming hơmet, kơna pơm ăn 2 tŏ rơmo lôch:“Hnam nhôn đei 4 tŏ rơmo jĭ. ‘Măng mă blŭng ƀô̆h tơblêu tơblao tơ̆ akau hăp, ba ư̆h kơ băt rơmo jĭ yă kiơ, na chă hiĕm nhen năr hmă, đơ̆ng rŏng ‘nŏh 2 tŏ rơmo lôch. Kơdră tơring pơtho vei lăng năng tông rơmo jĭ păng kron rơmo jĭ hơdrô̆.”

         Lăp đơ̆ng rŏng đei ƀô̆h rơmo jĭ tơ̆ tơring Đak Djrăng, apŭng mang Yang, jĭ pơ ‘ngĕh akar tơ̆ kon tơrong hlôi đei ƀô̆h tơ̆ 2 tơring kơ apŭng Đak Đoa păng 1 tơring kơ apŭng Chư̆ Sê, hăm akŏp kon tơrong jĭ trŭh 47 tŏ. Tơroi găh tơdrong tang găn jĭ au, ƀok Lữ Quốc Tuấn, Kơ iĕng Kơdră chĕp pơgơ̆r tơring Ia Pêt, apŭng Đak Đoa, dêh char Gia Lai tơbăt:“Pơgơ̆r gak vei lăng rim trong năm tơ̆ pơlei pơla, năm tơ̆ tơring, pruih pơgang pơlôch sơmach jĭ lơ̆m tơring. Hăm kon tơrong, dôm ŭnh hnam rong đei rơmo jĭ ‘nŏh kơdră tơring ăn hloi khul đoàn hơdrŭh tơdăm, khŭl kon pơlei jang sa pruih pơgang 1 năr 1 ‘măng; hăm dôm ŭnh hnam đei kon tơrong tim mă jĭ ‘nŏh pruih pơgang 1 ‘măng lơ̆m 2 năr.”

         Hrei au, akŏp kon tơrong kơ dêh char Gia lai đei hlŏh 435.000 tŏ, jing dêh char đei kon tơrong lơ hlŏh dơ̆ng mă 2 lơ̆m tĕh đak bơ̆n; găh lơ chă rong lơ̆m ŭnh hnam kơ dĭh, tơring kon kông.

Tơdrong tang găn jĭ, vei lăng năng tông kon tơrong ‘nŏh trong jang kăl hlŏh lơ̆m atŏk tơ iung mŭk drăm kơ kon pơlei. Kơ yuơ lơ lŏh, Dơnŏ anĭh vei lăng kon pơlei dêh char Gia Lai hlôi chĭh pơtrŭh hla bơar gĭt kăl găh tơdrong tơlĕch jang rim trong jang tang găn jĭ pơ ‘ngĕh akar tơ̆ kơpô rơmo lơ̆m dêh char. Kiơ̆ kơ ‘nŏh, Dơnŏ anih vei lăng kon pơlei dêh char Gia Lai athei rim tơring păng hơnĭh jang vei lăng chŏh jang sa jang kiơ̆ kơ jăp rim trong jang tang găn tơpŏh, răt vaccine ƀet ăn kon tơrong, iung jang tơgŭm djru păng pơlôch hŭt dôm kon tơrong lôch, dăr lăng kơ jăp găh tơdrong jĭ jăn tơ̆ kon tơrong vă hơmet ăn rim trong bơ̆ jang hơmet ăn.

Ƀok Dương Ngọc Thanh, Kơ iĕng kơdră chĕp pơgơ̆r Hơnĭh jang Pơgang vei lăng kon tơrong dêh char Gia Lai akhan, roi vơng, mŭr măih (hơngĕnh) ‘nŏh jing xem brem tơpŏh jĭ pơngĕh akar tơ̆ kon tơrong. Tơdrong mă au atŭm hăm tơdrong joăt chă vei hơchăng păng tŏ pơđang, ju kơtang tơjê̆ au jing tơdrong tơm pơm ăn jĭ pơ ‘ngĕh akar tơ̆ kon tơrong tơpŏh lang să. Ƀok pơkă athei kon pơlei vei lăng năng tông kon tơrong mă tơnăp, jang kiơ̆ ƀet vaccine vă tang găn jĭ:“Rŏ năng tơdrong tơpŏh jĭ lang să kơ yuơ xem brem pơm tơpŏh jĭ au ‘nŏh roi vơng, hăp păr tôch hơtăih kơna kăp đơ̆ng kon tơrong au năm tơ̆ kon tơrong to. Tơdrong au, hăm bơngai rong kon tơrong, măkăl bơngai rong rơmo ‘nŏh kăl vei lăng rơmo, năm răt ƀet vaccine vă kĕ bơ̆ng ăn kon tơrong. Mư̆h ƀô̆h kon tơrong đei chă jĭ au to năm tơroi kơdră tơring hloi vă iung jang hăm khŭl joăt jang pơtho tơbăt hơmet pơ ‘lơ̆ng.”

                                                                                                VOV Tây Nguyên chĭh

Tơblơ̆ nơ̆r: Amazưt