Ƀok Lê Phúc, Phŏ Kơdră Anih vei lăng tơdrong jĭ jăn dêh char Dak Lak tơroi, dôm khei blŭng sơnăm 2023, bơ̆ jang tơdrong pơgơ̆r ƀet bơ̆ng jĭ pơih xă tơ̆ dêh char oei tơƀâp lơ pơma tat yoa ưh kơmăh vắc-xin vă ƀet ăn đe hơiŏh, mă loi jĭ 1,2 kơloăi vắc-xin ưh kơmăh đunh đơ̆ng ki, pơm ăn rơbâu ‘nu hơiŏh tam mă đei ƀet bơ̆ng. Lơ̆m kơsô̆ 12 kơloăi/grŭp vắc xin lơ̆m tơdrong ƀet bơ̆ng pơih xă ăn đe hơiŏh lơ̆m sơnăm 2023 Dak Lak ‘nao đei tôm 2 kơloăi vắc xin tang găn jo jăn păng gơ̆ hơkâu; 2 kơloăi vắc xin “5 lơ̆m 1” păng DPT (jĭ Ƀach hâu, hiĕn iĕr-gơ̆ hơkâu) đĭ bơih, kơsô̆ oei đei dơ̆ng lăp măh tôm ƀet ăn hơiŏh truh đĭ khei 8. 

Kiơ̆ ƀok Lê Phúc, Phŏ Kơdră Anih vei lăng tơdrong jĭ jăn dêh char Dak Lak, tơdrong ưh kơmăh vắc xin đunh khei ‘năr rŏ năng gô pơm tơlĕch tơdrong ưh kơ ‘lơ̆ng vă tang găn jĭ lơ̆m tơpôl. Vă hơmet pơ ‘lơ̆ng tơdrong ưh kơmăh vắc xin, Anih vei lăng tơdrong jĭ jăn dêh char hlôi chih akŏm tơdrong ‘mĕh vă vắc xin păng tơlĕch trong pơtruh vắc xin lơ̆m sơnăm 2023 păng 2024 vă tơgŭm ăn Anih vei lăng tơdrong jang pơgang dêh char tơroi ăn Anih vei lăng kon pơlei dêh char tơlĕch jên vă răt.