Jơhngâm pran jĭ tơdrong kăp gĭt hlŏh hăm rim bơngai, jĭ tơdrong tôch gĭt kăl ăn tơdrong jang tŏk pran kơ jăp kơ teh đak. Lơ̆m chăl ‘nao hăm lơ tơdrong nol găh tơdrong jĭ jăn, kơsô̆ kon pơlei kră roi lơ, ‘mê̆ ‘mach cham char păng tơdrong tơplih mưh arih xa, tơdrong hơtŏk đon vei lăng ‘lơ̆ng jơhngâm pran ăn kon pơlei jing tơdrong jang tôch gĭt kăl. Tơdrong tơchơ̆t 72-NQ/TW ‘năr 09/9/2025 đơ̆ng Anih tơm Chinh trĭ găh “Mĭnh ƀar trong jang ‘lơ̆ng, hơtŏk tơdrong vei lăng năng tôm jơhngâm pran păng hơtŏk jơhngâm pran ăn kon pơlei” đei tơlĕch ‘nŏh jĭ trong jang gĭt kăl, tơƀôh hơdăh tơdrong băt lăng hơtăih păng đon pơhnŏng tôch pơneh đơ̆ng Đảng lơ̆m tơdrong jang pơgang.

Đơ̆ng sơnăm 2026–2030, Tơdrong tơchơ̆t 72 tơlĕch đon pơhnŏng pơjing anih jang pơgang hơtŏ, ‘lơ̆ng, đei yoa păng mât hơdai, pơm ‘lơ̆ng vă rim bơngai đei khăm hơmet jĭ, vei lăng jơhngâm pran hăm kơsô̆ jên lăp ‘lơ̆ng, mă hơdăh:

- Hơtŏk jơhngâm pran, đon rơgei, hơkâu jăn păng sơnăm arih sot pran ăn kon pơlei. Truh sơnăm 2030, hơtŏk kơsô̆ vơ̆ kơjung jô̆ păh lăp ăn hơioh păng druh dăm păh iung đơ̆ng 1-18 sơnăm tŏk dơ̆ng 1,5cm; sơnăm arih sot jô̆ păh lăp đei 75,5 sơnăm, lơ̆m noh sơnăm arih pran jăng tŏ sĕt hlŏh ‘nŏh truh 68 sơnăm.

- Tơjur ƀiơ̆ tơdrong jĭ jăn pơmat tat păng vei lăng ‘lơ̆ng dôm tơdrong hơmơt ƀơm ưh ‘lơ̆ng truh tơ̆ jơhngâm pran. Kơsô̆ bơngai đei bơ̆ng tôm vắc-xin lơ̆m Tơdrong jang ƀet bơ̆ng jĭ đei hlŏh 95%. Kơsô̆ kon pơlei hơnơ̆ng pơtâp pơhrăm hơkâu jăn tŏk dơ̆ng 10%. 

Hơtŏk tơdrong vei lăng dôm tơdrong krê ƀơm ưh ‘lơ̆ng truh tơ̆ jơhngâm pran nhen tơdrô, ƀier, hât păng đơ̆ng cham char nhen teh, đak, hơyuh kial...

- Kon pơlei đei iŏk yoa dôm tơdrong pơvih găh jang pơgang ‘lơ̆ng, năm truh tơdrong vei lăng jơhngâm pran tôm tĕch tôm tơ̆l. 

- Đơ̆ng sơnăm 2026, kon pơlei đei khăm hơlen jơhngâm pran kiơ̆ khei mă ưh ‘nŏh khăm hơlen tơdrong jĭ ưh đei hiong jên tŏ sĕt hlŏh 1 sơnăm 1 vât, đei pơm ăn hla ar vei lăng jơhngâm pran lơ̆m kơmăy điên tư vă vei lăng jơhngâm pran truh đĭ chăl arih, dar deh pơm tơjur ƀiơ̆ tơdrong huach lơ jên vă khăm hơlen jĭ. Truh sơnăm 2030, kon pơlei ưh đei nôp jên hơmet jĭ kiơ mưh khăm hơmet hăm ƀao hiêm pơgang, kiơ̆ trong đei tơlĕch.

- Đĭ đăng hnam pơgang tơ̆ xăh đei răt hơmet tôm tơmam, kơmăy kơmŏk, bơngai jang rơgei vă bơ̆ jang ‘lơ̆ng tơdrong jang; truh sơnăm 2027 đei tŏ sĕt hlŏh ‘nŏh đơ̆ng 4-5 ‘nu ƀak si. Hơtŏk kơsô̆ bơngai khăm, hơmet jĭ hăm ƀao hiêm pơgang tơ̆ hnam pơgang xăh tŏk truh 20%.

- Truh sơnăm 2026, kơsô̆ kon pơlei đei răt ƀao hiêm pơgang loi 95%, truh sơnăm 2030 đĭ đăng kon pơlei đei ƀao hiêm pơgang ngăl; hơtŏk lơ ƀao hiêm vei lăng jơhngâm pran.

Trong vă jang truh sơnăm 2045:

- Adrin pơjing đei cham char arih xa ‘lơ̆ng; dôm tơdrong hơgăt găh jơhngâm pran kon pơlei, tơdrong vei lăng jơhngâm pran tŏk dang ăi hăm dôm teh đak pơdrŏng lơ̆m tơring păng apŭng plenh teh. 

- Kon pơlei đei sơnăm arih sot jô̆ păh lăp loi 80 sơnăm, lơ̆m noh sơnăm arih pran ‘lơ̆ng truh 71 sơnăm, hơkâu jăn, jơhngâm pran, tih kơjung đơ̆ng đe druh dăm dang ăi hăm dôm teh đak pơdrŏng. 

- Anih jang pơgang ‘nao ‘lơ̆ng, hơtŏ băl, bơ̆ jang đei yoa, kơjăp ‘lơ̆ng, iŏk anih hơmet ăn bơngai jĭ pơm tơm, pơm lăp hăm tơdrong ‘meh vă vei lăng jơhngâm pran roi đunh roi tŏk păng roi lơ đơ̆ng kon pơlei.

Vă jang đei dôm tơdrong kơpal, Tơdrong tơchơ̆t 72 tơlech dôm tơdrong jang, trong vă jang pran ‘lơ̆ng, đei:

1. Tơplih ‘nao mă brĕ đon tơchĕng păng trong bơ̆ jang mưh chĕp kơ̆l pơgơ̆r bơ̆ jang vei lăng, năng tông păng pơm hơtŏk jơhngâm pran ăn kon pơlei.

2. Tơtom hơmet pơ ‘lơ̆ng trong pơgơ̆r jang, akŏm jơhngâm hơtŏk tơdrong rơgei ăn rim anih jang pơgang, mă loi ‘nŏh anih jang pơgang tang găn tơdrong jĭ, anih jang pơgang tơ̆ tơring, hơtŏk tơdrong pran ‘lơ̆ng đơ̆ng anih jang pơgang y học cổ truyền.

3. Hơtŏk đon tơnăp ‘lơ̆ng, tưk tơiung khul bơngai jang pơgang rơgei, hrơ̆ch ‘lơ̆ng, pơm lăp đon bơngai jĭ păng mât hơdai hăm apŭng plenh teh.

4. Hơtŏk tơdrong hơmet ming trong pơm hla ar mưh jang pơgang păng tưk tơiung pran ‘lơ̆ng, đei yoa hăm dôm tơdrong tơgŭm kiơ̆ ƀao hiêm pơgang.

5. Atŏk tơiung khoa hŏk, kơmăy kơmŏk, tơplih ‘nao rơgei păng tơplih hăm kơmăy sô̆ tôm tơdrong mưh vei lăng jơhngâm pran.

6. Atŏk tơiung anih jang pơgang kơdih, akŏm jơhngâm, iŏk yoa ‘lơ̆ng jên hu, bơngai jang vă tưk tơiung tơdrong jang pơgang.

Tơdrong tơchơ̆t 72 tôch gĭt kăl lơ̆m trong jang atŏk tơiung teh đak. Mĭnh teh đak lăp gơ̆h jang tŏk pran kơjăp mưh kon pơlei đei jơhngâm pran ‘lơ̆ng đĕch. Tơmât jên ăn jang pơgang ‘nŏh jĭ tơmât jên ăn ning mônh kơnh, ăn khul bơngai jang – tơdrong tôch gĭt kăl vă jang tŏk mŭk drăm păng gơ̆h hơgei lơ̆m tơpôl.

Tơdrong tơchơ̆t ưh lăp sek tơlang dôm tơdrong tam mă pran ‘lơ̆ng tơ̆ rim anih jang pơgang hrei ‘nâu đĕch mă oei pơjing tơđrong ‘lơ̆ng vă tưk tơiung lơ̆m đon tơchĕng păng tơdrong bơ̆ jang. Tơdrong tơplih pran đơ̆ng “hơmet jĭ” jing “vei lăng jơhngâm pran tôm tĕch tôm tơ̆l”, đơ̆ng ưh kơchăng jing kơchăng, đơ̆ng hơmet jĭ jing tang găn jĭ ‘nŏh jĭ 1 hơyak năm tôch gĭt kăl, lăp hăm trong jang tŏk đơ̆ng apŭng plenh teh.

Atŭm hăm ‘nŏh, Tơdrong tơchơ̆t 72 oei tơgop hơmet kơjăp đon lui đơ̆ng kon pơlei hăm anih jang pơgang, pơm hơtŏk ‘lơ̆ng tơdrong arih xa păng kơsô̆ hiôk chơt kơ teh đak. ‘Nâu kŭm jing tơdrong gĭt kăl tơgŭm ăn Việt Nam hơtŏk kơsư̆k pơjei păng anih dơ̆ng lơ̆m apŭng plenh teh.