VOV4.Bahnar  – Pơgê năr 28/6, Phŏ Kơdră Anih vei lăng kon pơlei dêh char  Nguyễn Hữu Tháp năm hơlen tơdrong lang xă pơrang ƀre ƀronh hăm hla ƀum ƀlang tơ̆ xăh Đăk Năng, plei tơm Kon Tum. Lơ̆m tơring kơ plei tơm Kon Tum ƀôh đei pơrang ƀre ƀronh hla ƀum ƀlang hăm hơgăt xă pơhlom 187ha, tơ̆ 7 xăh, phường. Xăh Đăk Năng jing tơring đei hơgăt ƀum ƀlang ƀơm pơrang lơ hloh hăm 140ha, lơ̆m noh đei 3ha ƀơm pơrang hlăm hloh 70%. Đei băt, âu jing pơrang đei xơkơ̆t yuơ đơ̆ng virus pơm đei, tơpoh tenh.

          Đơ̆ng chă hơlen tơdrong đei ƀôh, Phŏ Kơdră Anih vei lăng kon pơlei dêh char Kon Tum Nguyễn Hữu Tháp pơkăl Anih vei lăng Choh jang xa păng Hơtŏk tơring pơxĕl, rim anih juăt jang tơgŭm kon pơlei chă hơlen hơmet tang găn pơrang ƀre ƀronh hla ƀum ƀlang. Hăm hơgăt mă ƀơm răm kơtang noh athei xoh lê̆ kiơ̆ ƀlep pơkăp kih thuơ̆t; hăm hơgăt mă ƀơm da ƀiơ̆, noh athei rô̆ hŭt lê̆ dôm tơm ƀơm pơrang, păng xoh lê̆ vă pơrang ưh đei lang xă.

Lan chih păng pơre nơ̆r