VOV4.Bahnar - Tơ̆ hơ năp tơ drong jĭ Covid-19 oei tơ pŏh tôch hơ mơt tơ̆ lơ tĕh đak lơ̆m apŭng plenh tĕh, kŭm nhen lơ̆m tĕh đak bơ̆n, khei ‘năr âu ki, dôm dêh char đei trong sơ lam hơ dai hăm tĕh đak Campuchia đei lơ trong jang tôch đei yoa, tơ gop găn lê̆ tơ drong jê̆, vei kơ jăp trong sơ lam.

Kiơ̆ ƀok Trần Hòa Hợp, Kơ dră vei lăng kon pơ lei apŭng An Phú, dêh char An Giang, tơ ring đei trong sơ lam kơ jung hlŏh 40km, sơ lam hăm apŭng Angkor Bourei, Bourei Cholsar, Koh Thum găh dêh char Kandal păng Takeo, tĕh đak Campuchia. Tơ̆ hơ năp tơ drong jĭ Covid-19 oei tơ pŏh tôch hơ mơt, An Phú đei năng jĭ tơ ring “tơ tŏ” găh tơ drong pơm glăi dôm tơ drong hơ găt hăm tơ ring sơ lam. Lăp jô̆ đơ̆ng blŭng sơ năm truh dang ei, dôm khul linh jang kơ pal chă ƀôh, găn đei hlŏh 700 ‘nu bơ ngai mât lĕch lơ̆m tĕh đak glăi luơ̆t.

   Bơ̆ jang tơ drong jang tơm ưh ăn đe mât lơ̆m tĕh đak glăi luơ̆t, ưh ăn jĭ tơ pŏh lơ̆m tơ pôl, tơ ter trong sơ lam khul jang kơ pal oei vei kơ jăp tơ drong vei lăng tơ̆ trong tĕh păng trong đak. Ƀok Trần Hòa Hợp ăn tơ băt: “Nhôn hlôi tơ lĕch tơ drong jang đĭ đăng kon pơ lei vang tang găn jĭ. Kiơ̆ đơ̆ng tơ lĕch tơ drong jang ‘nŏh…kon pơ lei roi hlôh vao, băt hơ dăh hơ năp jang đơ̆ng kơ dih lơ̆m tơ drong tang găn jĭ; tơ tom chă ƀôh, tang găn, tơ kêng dôm bơ ngai đơ̆ng nai truh, mă loi hăm dôm bơ ngai mât lơ̆m tĕh đak glăi luơ̆t, đơ̆ng tĕh đak Campuchia mât tơ̆ tơ ring”.

Vă găn bơ ngai mât lơ̆m tĕh đak glăi luơ̆t, atŭm hăm ‘nŏh jang ‘lơ̆ng tơ drong tang găn jĭ, ‘ngoăih kơ vei kơ jăp tơ ring sơ lam, khei ‘năr tơ jê̆ âu, apŭng An Phú tơ lĕch tơ drong jang đĭ đăng kon pơ lei vang tang găn jĭ Covid-19, “1 ‘nu kon pơ lei ‘nŏh jĭ 1 ‘nu linh”; tơ gŭm ăn khul kơ dră pơ gơ̆r chă ƀôh dôm bơ ngai mât lĕch tơ̆ tơ ring sơ lam glăi luơ̆t, tang găn jĭ Covid-19 ƀơm kơ nê̆ truh tơ pôl. ‘Nhŏng Nguyễn Minh Trí, 1 ‘nu kon pơ lei oei tơ̆ xăh Vĩnh Hội Đông, apŭng An Phú ăn tơ băt: “Ba ‘nŏh jĭ kon pơ lei kơ na athei đei đon jang mă tơ năp… Inh mât jang lơ̆m khul dăr joang kơ tơ ring đei hlŏh 1 khei âu bơih…vă vei lăng jơ hngâm pran tơ pôl, kon pơ lei păng kơ dih kâu bơ̆n hai”.

Tơ drong dôm bơ ngai mât lơ̆m tĕh đak glăi luơ̆t đơ̆ng Campuchia mât tơ̆ Việt Nam kiơ̆ trong dêh char An Giang, tôch hơ mơt pơm tơ pŏh jĭ lơ̆m dêh char ưh băt kơ plăh yơ. Hăm tơ drong tơm “Ưh ăn bơ ngai mât lĕch glăi luơ̆t, găn đei tơ drong jĭ lơ̆m tơ pôl”, kăn ƀô̆, linh tơ̆ dôm anih gak, khul dăr joang, vei lăng prăt măng, prăt năr, vei kơ jăp ‘măng jang sơ lam, dôm trong iĕ, trong sĕr, hơ bong, thong đak ro klĕch tĕh đak…găn đĭ rim bơ ngai mât lĕch glăi luơ̆t tơ̆ tơ ring sơ lam. ‘Nhŏng Trần Minh Chiến, Phŏ Kơ dră Anih chĕp kơ̆l khul linh xăh Vĩnh Hội Đông, apŭng An Phú tơ roi dơ̆ng: "Hăm jơ hngâm đon jang tơ năp. Khul klăih song pơm 2 grŭp, 1 grŭp năm tŏk tơ̆ plei Vĩnh Hòa, grŭp jur tơ ter phương Vĩnh Ngươn vă pơm ‘lơ̆ng ăn tơ drong tang găn jĭ”.

Tơ roi truh dôm tơ drong mơ mat tat đơ̆ng khul linh vang dăr joang, Đại úy Chau Ône, Phŏ Kơ dră chĕp kơ̆l Kơ đông Vĩnh Hội Đông, Ƀô đô̆i vei lăng tơ ring sơ lam dêh char An Giang ăn tơ băt: “Gơ măng lăng hơ tăih ưh hơ dăh hăm dôm khul dăr joang… mă 2 dơ̆ng, mưh đei ‘mi kial ‘nŏh tôch mơ mat tat. Mă lei hăm đon pơ hnŏng tôch ai đơ̆ng khul linh…nhôn chă pơ lung băl, adrin dăr joang vei lăng ‘lơ̆ng dôm tơ ring”.

Dêh char Đồng Tháp đei hlŏh 50km trong sơ lam hăm dêh char Pray-veng, tĕh đak Campuchia, đei 2 ‘măng jang sơ lam Thường Phước păng Dinh Bà. Groi tĕh ưh kơ ‘lơ̆ng, đei lơ hơ bong, thong đak iĕ đĕch tôch hiôk ăn đe ôn kơ ‘nơp, hlơp măt khul jang kơ pal.

        ‘Nhŏng Nguyễn Quốc Triệu, Dân quân xăh Thông Bình, apŭng Tân Hồng tơ roi, khul linh dân quân bơ̆ jang ‘lơ̆ng tơ drong jang tơ gŭm ăn dôm khul linh nai tơ̆ dôm anih gak vă băt hơ dăh tơ tom rim tơ drong, chă ƀôh păng sek tơ lang tơ păt dôm bơ ngai, khul grŭp pơ gơ̆r, tơ gŭm, sơng, chông bơ ngai mât lĕch lơ̆m tĕh đak glăi luơ̆t: “Hơ len năng rim gre vih vât, tơ tă ăn kon pơ lei gom muh măt, ôp ti hăm đak pơ gang pơ lôch pơ rang jĭ…tơ dăh ƀôh bơ ngai đơ̆ng nai truh ‘nŏh athei khăm hơ len kôp gre, hla ar sư vă tang găn jĭ Covid păng đe mât lĕch glăi luơ̆t”.

Ƀok Nguyễn Văn Cọp, Kơ dră vei lăng kon pơ lei xăh Thông Bình, apŭng Tân Hồng, ăn tơ băt, khei ‘năr tơ jê̆ âu, khul kơ dră tơ ring kŭm hăm dôm khul jang kơ pal vang bơ̆ jang tang găn jĭ tơ̆ tơ ring sơ lam, hơ tŏk tơ drong tơ roi tơ băt, krao hơ vơn kon pơ lei bơ̆ jang mă ‘lơ̆ng tơ drong tang găn jĭ Covid-19, ưh đei tơ gŭm chông ba bơ ngai mât lĕch glăi luơ̆t, athei năm roi tơ băt mưh ƀôh bơ ngai pơm glăi tơ drong hơ găt tơ̆ tơ ring sơ lam, ‘nâu jĭ tơ drong đei khul kơ dră tơ ring păng dôm khul jang kơ pal bơ̆ jang hơ nơ̆ng: “Truh dang ei găh tơ drong jang tơ roi tơ băt, gơ̆h pơ ma kon pơ lei tơ̆ tơ ring tôch đei đon kơ chăng, hlôh vao hơ dăh tơ drong jang tang găn jĭ. Mă loi hăm dôm bơ ngai đơ̆ng nai truh tơ̆ tơ ring, ‘ngoăih kơ tơ ring chă ƀôh ‘nŏh kon pơ lei kŭm ƀôh păng năm tơ roi tôch tơ tom”.

Dôm dêh char nai nhen Kiên Giang păng Cà Mau kŭm tơ lĕch păng bơ̆ jang ‘lơ̆ng tơ drong jang hơ doi vang dăr joang, vei lăng bơ ngai yak vih vât; vă chă ƀôh hrôih păng sek tơ lang tơ tom dôm bơ ngai mât lơ̆m tĕh đak glăi luơ̆t kơ plăh khei ‘năr âu.

Mă đơ̆ng tơ drong jĭ dang ei oei tôch hơ mơt, ưh gơ̆h băt hơ drol, mă lei mưh linh hăm kon pơ lei mĭnh jơ hngâm ‘nŏh mơ mat yơ kŭm tŏk hlôi đĭ. Lơ̆m ‘măng tơ jră hăm jĭ hơ buh tôch mơ mat âu, tơ drong tơ guăt mĭnh ƀơ̆r đon mĭnh ‘măng dơ̆ng đei tưk tơ iung. Tơ̆ gơ măng găh tơ ring sơ lam hơ tăih hơ tŏ, khul linh hăm kon pơ lei mĭnh jơ hngâm đon tơ̆ mĭnh jăl trong tang găn jĭ. Đĭ đăng yoa tơ ning ‘lơ̆ng hơ iă ƀiơ̆ păng hiôk, sơ đơ̆ng ƀiơ̆.

Dơ̆ng: Tơ blơ̆