VOV4.Bahnar - Mơ̆t lơ̆m khei ‘năr phĕ tĕch kơ sơ năm 2021, kơ jă mơ kai jur ưh kơ ê pă hơ la kơ 3000 hlak jên 1 kĭ. Tơ drong ‘nâu, pơm ăn lơ kon pơ lei pơ tăm mơ kai tơ̆ Gia Lai đei hiong năr jang, lôh jên tơ mơ̆t jang. Dang ei, tơ̆ dêh char Gia Lai đei hloh 1.000 hek tar mơ kai, akŏm tơ̆ dôm apŭng Krông Pa, Phú Thiện, Ia Pa, Chư Prông… Pơ yan mơ kai đa đei lơ̆m 3 khei hơ tuch sơ năm, kon pơ lei athei pơm kang kưt oei sa kơ tă tơ̆ chŭn vă vei lăng tôch kơ gleh hrat.

Kon pơ lei jang mơ kai măh pơm kang kưt, oei sa kơ tă tơ̆ chŭn lơ̆m 3 khei vă vei lăng mơ kai

Sơ năm ‘nâu, kơ jă mơ kai jur lơ, pơm ăn tơ drong gleh hrat ‘noh ưh kơ đei yua kiơ. Ƀok Nguyễn Tuấn Anh- Phŏ Kơ dră Anih vei lăng kon pơ lei xăh Ia Mơr, apŭng Chư Prông tơ băt: khei ‘năr âu kơ sơ năm sơ̆ kơ jă đơ̆ng 6000 hlak jên truh 7000 hlak jên 1 kĭ ‘noh kon pơ lei đei lơi bơ̆ih. Mă lei dang ei, kơ jă dang 2.500 truh 3.000 hlak jên 1 kĭ ‘noh mĭnh hek tar lôh dôm jĭt triê̆u, kơ na tôch mơ mat tat ăn kon pơ lei, tôch kơ ‘meh đei trong jang tơ gŭm 1 păh.

Thuem: Tơ blơ̆