VOV4.Bahnar Trŭh pơyan phĕ tĕch sơnăm 2021, kơ jă pơkai tơjur tôch kơtang lăp pă 3.000 hlak jên lơ̆m 1 kĭ. Tơdrong mă au pơm ăn lơ kon pơlei pơtăm pơkai tơ̆ Gia Lai hiong răm tôch kơtang.

Kon pơlei măh pơm pơssŭn, oei sa kơtă tơ̆ chŭn mir lơ̆m 3 khei vă vei lăng pơkai

15 sơnăm mơng tĕh pơtăm pơkai tơ̆ tơring Ia Mơr, apŭng Chư̆ Prông, dêh char Gia Lai, ƀok Bùi Hữu Phước (46 sơnăm oei tơ̆ tơring Bình Nghi, apŭng Tây Sơn, dêh char Bình Định) tơbăt, tim gan lăh kơ jă pơkai tơjur kơtang nhen pơyan au. Sơnăm au kơ jă phŏng păng tơmam drăm pơyua ăn chŏh jang sa tŏk măt, vă tơmơ̆t jên jang pơtăm 2ha pơkai, ƀok hlôi tơlĕch 100 trĭu hlak jên, tok iok dơ̆ng đơ̆ng hơnĭh mong jên 60 trĭu hlak jên. Blŭng pơyan, kơ jă pơkai 7.000 hlak jên lơ̆m 1 kĭ, ‘nŏh pơkai ƀok tim mă gơ̆h vă phĕ tĕch. Tŏk bŏk pơyan, kơ jă tơjur tôch kơtang lăp pă 3.000 hlak jên lơ̆m 1 kĭ, ‘nŏh tơbăt hơdăh hiong răm găh kon jên tơmơ̆t jang bơih ‘nau. Mă lei, kơ jă tim tom tŏk, tă đei hê̆ ‘mi hơdrơ̆k pơyan pơm ăn pơkai lơ̆m chŭn mir hơđang, pơm ăn kơ ƀok măh phĕ tĕch hŭt lăp 2.500 hlak jên lơ̆m 1 kĭ.“Lơ̆m blŭng pơyan ‘nŏh đei trŭh 7.000 hlak jên lơ̆m 1 kĭ. Dang ei Trung Quốc tang ‘măng sơlam tĕh đak, ư̆h kơ gư̆h vă chă tĕch ăn teh đak đe kơna tơjur pă 2.500 hlak jên lơ̆m 1 kĭ. Lơ̆m 1 sao bơ̆n hiong răm dang 6 trĭu. Hiong răm kon jên tơmơ̆t jang kơna ư̆h kơ đei jên vă jang sa lơ̆m pơyan đơ̆ng rŏng dơ̆ng”.

Mŏ Toán tơ̆ chŭn mir pơkai sư tơ̆ tơring Ia Mơr

Jei lei lăi hăm ƀok Phước, 3 khei au ki, klo akăn mŏ Văn Thị Toán (39 sơnăm) jei lê̆ 2 ‘nu kon hơ ‘lơ̆p tơ̆ pơlei Bình Định, năm tơ̆ tơring Ia Mơr, apŭng Chư Prông, dêh char Gia Lai mơng tĕh, pơtăm pơkai. Trŭh khei ‘năr phĕ tĕch vă brŏk vĭh sa Têt hăm ŭnh hnam, mă lei klo akăn mŏ Toán tă sơ ‘nhôi sơ ‘ngon kơ yuơ kơ jă pơkai tơjur tôch kơtang: “Ba tơlĕch kon jên jang lơ̆m 1 ha ‘nŏh 160 trĭu hlak jên. Jên hơvơ̆h đe jang hrei au jei măt, bơ̆n chă tĕch lăp 3.000 hlak jên lơ̆m 1 kĭ ‘nŏh hiong răm tôch kơ tang, lơ̆m 1 ha hiong răm trŭh 40 trĭu hlak jên. Hiong răm jơ ‘năr klo akăn jang, kon hơ ‘lơ̆p lê̆ tơ̆ hnam, klo akăn năm tơ̆ au jang sa ư̆h kơ lĕch”.

Hrei au, tơ̆ Gia Lai đei hlŏh 1.000 ha pơkai, akŏm lang sa chă pơtăm tơ̆ rim apŭng Krông Pa, Phú Thiện, Ia Pa, Chư Prông…Pơyan jang pơkai lơ̆m 3 khei hơtuch sơnăm, bơngai jang pơtăm pơkai măh pơm pơsŭn oei hloi tơ̆ mir vă vei lăng năng tông tôch glĕh hrat. Sơnăm au, kơ jă pơkai tơjur tôch kơtang, pơm ăn tơdrong glĕh hrat ‘nŏh pă đei pơm pơchhơp jơhngơ̆m. Ƀok Nguyễn Tuấn Anh- Kơ iĕng Kơdră chĕp pơgơ̆r Dơnŏ anĭh vei lăng kon pơlei tơring Ia Mơ̆r, apŭng Chư̆ Prông tơbăt:“Kơjă nhen sơnăm sơ̆ đơ̆ng 6.000 trŭh 7.000 hlak jên lơ̆m 1 kĭ ‘nŏh kon pơlei jang sa đei iŏk yua kơ jăp ƀiơ̆. Trŭh dang ei kơ jălăp dang đơ̆ng 2.500 trŭh 3.000 hlak jên lơ̆m 1 kĭ ‘nŏh kon pơlei tơlĕch kon jên tơmơ̆t jang sa, ‘nŏh lơ̆m 1 ha hiong răm trŭh mơjĭt trĭu hlak jên. Kơna tôch mơmat tat ăn kon pơlei, hơpơi đei trong bơ̆ jang tơgŭm djru tŏ sĕt ăn kon pơlei”.

Bơngai chih: Nguyễn Thảo

Tơblơ̆ nơ̆r: mazưt