VOV4.Bahnar - Pơgê năr 6/12, Hnam pơgang tơm dêh char Kon Tum Tơroi tơbăt găh 8 ‘nu bơngai tơpŏh jĭ Covid-19 đei ƀô̆h tơ̆ hnam pơgang đơ̆ng năr 2-4/12. Kiơ̆ kơ ‘nŏh 8 ‘nu F0 đei 2 ‘nu bơngai ƀok thây pơgang, ‘nŏh 1 ‘nu ƀak si păng 1 ‘nu jang điêu dưỡng. 6 ‘nu bơngai F0 uơ oei đei 3 ‘nu bơngai jĭ hnam oei lơ̆m pơlei tơm Kon Tum, apŭng Sa Thây păng Kon Braih; 1 ‘nu bơngai drŏ kăn hơnăp hnam oei tơ̆ apŭng Đak Ha păng 1 ‘nu hnam oei tơ̆ apŭng Sa Thây.

Hnam pơgang tơm dêh char Kon Tum hơnĭh đei ƀô̆h 8 ‘nu F0

Đĭ đăng rim bơngai F0 đei ƀô̆h lơ̆m hnam pơgang tơm dêh char Kon Tum hlôi ba năm trŭh oei hơdrô̆, ming hơmet tơ̆ Hnam pơgang Pơgia kơsô̆ 1 dêh char Kon Tum. Lăp đơ̆ng rŏng ƀô̆h 8 ‘nu F0, Hnam pơgang tơm dêh char Kon Tum hlôi năm tơchă dôm bơngai oei tơ jê̆, ăn oei hơdrô̆ hăm dôm bơngai F1, F2; atŏk kơtang bơ̆ jang pruih pơgang pơlôch sơmach tơ̆ rim hơnih ming hơmet dôm bơngai tơpŏh jĭ Covid-19; jang kiơ̆ kơ jăp vei lăng năng tông dôm bơngai ŭnh hnam bơngai jĭ mơ̆t lĕch lơ̆m hnam pơgang; hơnơ̆ng dăr lăng kơ jăp tơdrong chă tơpŏh hăm bơngai jĭ, bơngai ŭnh hnam bơngai jĭ păng đĭ đăng ƀok thây pơgang.

Tơblơ̆ nơ̆r: Amazưt