VOV4.Bahnar - Khul kơ dră pơ gơ̆r păng anĭh choh jang xa Kon Tum kŭm đei trong jang tôch kơ chăng vă tang găn tŏ phang ăn ‘long pơ tăm. Tơ̆ xăh sơ lam Rờ Kơi, apŭng Sa Thầy, dêh char Kon Tum đei 70ha ƀa đak pơ yan phang kŭm hăm hlŏh 2.000ha ‘long pơ tăm lơ kơ loăi. Vă vei lăng măh mai đak ăn ‘long pơ tăm, xăh đei 9 tŏ dơ nâu mong đak. Khul kơ dră pơ gơ̆r xăh pơ jing 8 grŭp vei lăng, pơ choh đak tơ̆ dôm dơ nâu vă gơ̆h iŏk yoa đak ‘mơ ‘met, đei yoa ‘lơ̆ng. 

Kơ chăng mong măh mai đak vă tơ ruih ăn ‘long pơ tăm pơ yan phang tơ̆ apŭng Đăk Hà

Lơ̆m dêh char Kon Tum dang ei đei 178 dơ nâu đak, đei măh mai đak tơ ruih ăn vă jê̆ 11.000 ha ‘long pơ tăm, mă lơ ‘nŏh jĭ ƀa đak păng ‘long kăp gĭt. Truh ƀât blŭng khei 3 âu ki, dôm dơ nâu đak âu oei mong măh mai đak tơ ruih ăn ‘long pơ tăm. Mă lei tơ dăh pơ yan phang pơ dui đunh truh hơ tuch khei 3, ƀât blŭng khei 4 ‘nŏh tơ drong ưh kơ măh đak gô đei hăm dang 1.000ha ‘long pơ tăm akŏm tơ̆ dôm apŭng: Sa Thầy, Đăk Hà, Kon Braih păng plt Kon Tum.

Dơ̆ng: Tơ blơ̆