VOV4.Bahnar - Lơ̆m jang kiơ̆ tơdrong jang ming hơmet rim jăl trong kơnê̆ kơ trong glung 24, tơ̆ tơnô̆ kơsô̆ 5 yak hlŏh tơring Hiếu apŭng Kon Plông, dêh char Kon Tum hlôi đei tơdrong đak lŏk klơ tĕh lơ̆p hê̆ 8ha chŭn na ƀa đak kon pơlei. Vă sơđơ̆ng tơring adoi nhen sơđơ̆ng ăn ming man, rim hơnĭh bơ̆ jang dêh char Kon Tum hlôi tĕnh koăng iung jang hăm nơ̆r pơkăp kơ hơnĭh ming man ‘nŏh tơgŭm djru trŏ ƀlep ăn kon pơlei.

Ming man mĭnh păh jĭh trong kơ tơnô̆ jang kơsô̆ 5

Ƀar păh trong glung 24 yak hlŏh tơring Hiếu, apŭng Kon Plông, tơ̆ lơ jăl tŏk bŏk iung jang ming hơmet trong glung tơ̆ mĭnh ƀar hơnĭh tĕh tơmo hlôi răm đak lŏk jrŏh klơ̆p chŭn na ƀa đak pơm ăn kon pơlei ư̆h kơ gơ̆h chŏh jang sa. Ƀok Phan Thế Vinh, Kơdră chĕp pơgơ̆r Dơnŏ anĭh vei lăng kon pơlei tơring Hiếu tơbăt, hơgăt tĕh jang chŭn na ƀa đak răm au găh lơ kơ kon pơlei rim pơlei: Đak Lom, Vi Glơng păng Kon Plông:“Lơ̆m ming man trong grung 24 đei ƀơm kơnê̆ đơ̆ng ‘mi kial hlôi pơm ăn tĕh tơdrŭt păng đak lŏk klơ klơp hloi chŭn na ƀa đak. Kon pơlei jei tŏk bŏk gôchang rim hơnĭh bơ̆ jang kơpal iung jang hăm dơnŏ anĭh tơmơ̆t jên jang vă tơgŭm ăn kon pơlei tơtom păng sơđơ̆ng hơgăt tĕh jang sa lơ̆m khei năr kơnh”.

        Kiơ̆ đơ̆ng hơnĭh ming man tơnô̆ jang kơsô̆ 5 găn hlŏh tơring Hiếu, mă đơ̆ng hlôi lăng trŭh tơdrong ‘nau păng hlôi hơdrin tơchă trong vă pơm dă ƀiơ̆ đơm kơnê̆ trŭh chŭn na ƀa đak kon pơlei jang sa mă lei ư̆h kơ kĕ. Tơdrong tơm pơm ăn ‘nŏh lơ̆m ming man jĭh trong tĕh groi kơjung, krang kơtang adoi hơnơ̆ng đei ‘mi kơna đak lŏk jrŏh ro năm tơ̆ thoong đak đei chŭn na ƀa đak kon pơlei. Ƀok Bùi Huy Trình, Kơ iĕng Kơdră chĕp pơgơ̆r Kŏng ty Trường Long, hơnĭh iŏk tơmơ̆t jên jang tơnô̆ kơsô̆ 5 tơbăt, hơnĭh au hlôi pơma pơkăp tơgŭm djru tơgăl ăn kon pơlei:“Hơnĭh nhôn au ‘nŏh hơnĭh ming man atŭm hăm rim pang ƀơm trŭh, tơngla tơmơ̆t jên jang giĕng kơnh hop akŏm đei trong jang vă tơgŭm ăn kon pơlei tơtom, tơgăl hlŏh”.

        Ƀok Nguyễn Văn Thanh, tang măt ăn Hơnĭh vei lăng tơdrong jang ming man trong nơnăm dêh char Kon Tum, hơnĭh đei Dơnŏ anĭh vei lăng Trong gre nơnăm dêh char Kon Tum pơjao vei lăng tơdrong vă jang au tơbăt:“Hơnĭh vei lăng tơdrong vă jang jei hlôi iung jang hơdoi hăm kơdră tơring, rim hơnĭh bơ̆ jang ƀơm trŭh, ŭnh hnam kon pơlei năm dăr lăng, pơtŏ hơgăt ƀlep păng pơjing trong vă jang gô tơgŭm djru hrŭ ăn kon pơlei tơgăl hlŏh”.

        Tơpă yan au đei ƀô̆h, lơ̆m ming man tơnô̆ jang 5 hơmet ming trong grung 24 găn hlŏh tơring Hiếu, apŭng Kon Plông hlôi đei tơdrong đak lŏk jrŭh dơ̆k tơnŏ klơ̆p vă jê̆ 8ha chŭn na ƀa đak kơ 87 ŭnh hnam hăm đei răm kơtang păh ai phara dĭh băl. Hơnĭh vei lăng tơdrong vă jang ming man trong gre nơnăm dêh char Kon Tum ‘moi kiơ̆ drơ̆ng mĭnh nơ̆r ƀar păh rim pang ƀơm trŭh hlôi pơjing trong jang tơgŭm ăn kon pơlei pơm 4 tơnô̆ tơgŭm. Mă hơdăh hăm dôm chŭn na đa đak tĕh tơmo klơ̆p trŭh 70% năm tơ̆ să ‘nŏh gô tơgŭm ăn kon pơlei 3 pơyan ƀa; đơ̆ng 50 trŭh 70% tơgŭm ăn 2 pơyan ƀa; đơ̆ng 20% truh 50% tơgŭm ăn 1 pơyan 1 poăt pơyan jang sa păng đei ƀơm kơnê̆ tim mă trŭh 35% hơgăt tĕh chŭn na gô tơgŭm ăn 1 poăt pơyan jang sa. Đei tơdrong lăp đon đơ̆ng kon pơlei, tơdrong tơgŭm djru đơ̆ng hiong răm au đei tơlĕch jang kiơ̆ hloi lơ̆m khei 10.

Bơngai chĭh: Khoa Điềm

Tơblơ̆ nơ̆r: Amazưt