5 sơnăm kơ ou, tơdrong jang pơlong băt 'mêm kơ teh đak tơ̆ Gia Lai hlôi đei jơnei kăp gĭt: hơtŏk mŭk drăm đei jê̆ 7% 1 sơnăm; vei sơđơ̆ng tơpôl teh đak, tơdrong asong jang, tĕch pơdro pơtoi ƀôh hơtŏk. Tơ̆ Hop akŏm, rim bơngai jang hơgei hlôi tơroi gah tơdrong hlôh vao, trong jang hơgei, lơ̆m noh hơdah nhen: Ƀô đô̆i vei sơlam teh dêh char hăm tơdrong jang “Pôk jơ̆ng oh năm truh hnam trưng, tơgŭm unh hnam hin dơnuh tơ̆ tơring sơlam teh”; tơdrong hơgei gah iŏk yua kih thuơ̆t 'nao lơ̆m khăm hơmet jĭ tơ̆ Hnam pơgang hơmet Jĭ Măt Gia Lai; tơdrong tơroi kơ pơmai H’Uyên Niê (xah Ia Ly) hăm pơkăp jang tơmang pơhiơ̆ pơlei pơla tơguăt hăm vei răk tơdrong tanh brai, pơm trong pơyua ăn kon pơlei kon kông...

Lơ̆m jăl sơnăm 2025–2030, tơdrong jang pơlong băt 'mêm kơ teh đak tơ̆ dêh char Gia Lai gô akŏm lơ̆m 4 grŭp sơnong jang tơm. Noh jing: pơtoi hơtŏk pơ-'lơ̆ng Đảng păng jơnŭm jang chinh trĭ bot 'lơ̆ng, pơm jang tơnăp; hơtŏk kơtang mŭk drăm jơk, choh jang xa kiơ̆ kơmăi kơmŏk 'nao, pơm tơlĕch tơmam drăm xa păng pơ-'lơ̆ng unh hơyuh; hơtŏk joh ayŏ - tơpôl, hơtŏk tơdrong hơrih ăn kon pơlei; atŭm hăm noh vei sơđơ̆ng tơpôl păng pơih să jang tơbôl, mă kăl noh hăm dôm dêh char gah pơbah teh đak Lào păng Hơlĕch Tu Campuchia.