Ƀơm truh tơdrong unh xa bri ‘long ƀach đan tơ̆ xăh Hơ Moong, apŭng Sa Thầy ‘năr 7/3 pơm ăn 2 ‘nu bơngai vang pĭt unh lôch, pơgê ‘năr 14/3, Anih pơvih ăn Khul kơdră chĕp kơ̆l đảng dêh char Kon Tum đei hla ar chih gơih ăn đe Kơdră pơgơ̆r Đảng lơ̆m Anih vei lăng kon pơlei dêh char pơtruh nơ̆r pơma đơ̆ng Khul kơdră chĕp kơ̆l đảng dêh char găh tơdrong ‘nâu.

Kiơ̆ kơ ‘nŏh, Khul kơdră chĕp kơ̆l đảng dêh char Kon Tum pơjao ăn đe kơdră pơgơ̆r Đảng lơ̆m Anih vei lăng kon pơlei dêh char jăh dăr hơlen, pơm hơdăh yoa kiơ đei unh xa păng sek tơlang tơpăt hơnăp jang hăm khul grŭp, rim bơngai đei ƀơm truh lê̆ đei tơdrong ơ̆h sơ ‘ngon âu. Păng athei tơroi ăn Khul kơdră chĕp kơ̆l đảng dêh char adrol kơ ‘năr 25/3/2023.