Kơdră chĕp kơ̆l Anih tơm sek tơlang kon pơlei Nguyễn Hòa Bình păng Kơdră chĕp kơ̆l Anih tơm tơkêng tơdrong yoch Lê Minh Trí vă tơl tơblang dôm tơdrong đei apinh tơ̆ hop akŏm. Kiơ̆ kơ ‘nŏh, Kơdră chĕp kơ̆l Anih sek tơlang Nguyễn Hòa Bình vă pơm hơdăh dôm trong jang pơm hơtŏk tơdrong ‘lơ̆ng mưh sek tơlang dôm tơdrong glăi, tơdrong yoch găh mŭk drăm, xa pơjĭp; Trong jang pơm hơtŏk đon hlôh vao, gơ̆h hơgei, nuih mơng, hơnăp jang đơ̆ng Bơngai pơgơ̆r sek tơlang păng dôm bơngai jang tơ̆ Anih sek tơlang; tơdrong tang găn păng sek tơlang tơdrong yoch xa pơjĭp, pơm glăi lơ̆m lơ̆m anih sek tơlang.

Oei Kơdră chĕp kơ̆l Anih tơkêng tơdrong yoch Lê Minh Trí vă tơl tơblang dôm trong jang pơm hơtŏk tơdrong ‘lơ̆ng mưh bơ̆ jang dăr hơlen, vei lăng tơdrong jang tư phap, sek tơlang dôm tơdrong yoch tih, mă loi jĭ dôm tơdrong yoch găh mŭk drăm, xa pơjĭp; ưh ăn đei tơdrong hŭt hơchăng, lon tơdrong yoch, sek phak glăi bơngai ưh đei yoch.