Pơgơ̆r lơ̆m 4 năr, tơ̆ ‘măng hop akŏm âu, Anih chĕp kơ̆l pơgơ̆r Kuôk hô̆i tơgop nơ̆r lơ̆m 16 tơdrong gĭt kăl hơmet ăn ‘măng hop akŏm mă 5, Kuôk hô̆i jăl 15. Pơma tơ̆ ‘măng pơgơ̆r blŭng a, Kơdră Kuôk hô̆i Vương Đình Huệ athei Anih chĕp kơ̆l pơgơ̆r Kuôk hô̆i tơchĕng hơlen ăn tơgop nơ̆r găh tơdrong kăl kơ hmet ming, tơmơ̆t dơ̆ng Luơ̆t dôm anih asong tŏk iŏk jên (hơmet ming).

Lơ̆m pơgê 9/5, tơgop nơ̆r lơ̆m hla ar tơroi tơbăt găh hơtŏk tơiung mŭk drăm - tơpôl păng jên hu teh đak dôm khei blŭng sơnăm ‘nâu, Anih chĕp kơ̆l pơgơ̆r Kuôk hô̆i akhan; tơdra hơdrol Jăl khei mă 2 mŭk drăm gô mơmat tat hloh Jăl khei mă 1, tơdrong ‘nâu tơlĕch ăn long nol tôch kơ tih hăm Khŭl kơdră teh đak lơ̆m tơdrong vei lăng mŭk drăm tih dôm Jăl khei đơ̆ng rŏng dơ̆ng vă hơdrin iŏk đei tơdrong hơgăt tŏk GDP 6,5% ăn pơ đĭ sơnăm. Kơdră Anih tơm tơlĕch nơ̆r sơkơ̆t păng tơmơ̆t jên jang Nguyễn Chí Dũng tơbăt; tơdrong mŭk drăm tơpôl khei 4 păng 4 khei blŭng sơnăm hlôi iŏk đei lơ jơnei ‘lơ̆ng, mŭk drăm sơđơ̆ng, hơtŏk kơ jă lơ đei vei lăng.