Hơnơ̆ng bơ̆ jang lơ̆m hop akŏm găh Luơ̆t khei 4, năr ‘nâu (14/4), Anih chĕp kơ̆l pơgơ̆r Kuô̆k hô̆i tơgop nơ̆r găh Trong tơmât jên ăn tơdrong jang pơm trong tơƀưh tơring kơ dôm dêh char Khánh Hòa, Ninh Thuận păng Lâm Đồng. Tơdrong jang jô̆ akŏm tĕh vă pơm trong truh 129 ha, lơ̆m nŏh tĕh bri kăl tơplih ming đei 75 ha; pơm trong kơjung 57km.

Kơ̆l trong tơƀưh hăm trong gre 27C kơ dêh char Lâm Đồng, anih hơtuch ‘nŏh ƀât sơlam kơ dêh char Khánh Hòa păng dêh char Ninh Thuận. Akŏm đĭ đăng jên tơmât jang dang 1.929 ti. Tơchĕng adrol tơdrong jang pơm kĕh jăl trong âu lơ̆m sơnăm 2027.

Kơdră Kuô̆k hô̆i Vương Đình Huệ pơma hơdăh: Tơdrong jang âu tôch gĭt kăl, vang tơgop hơtŏk pơ ‘lơ̆ng trong yak tơ̆ tơring groi kông găh Pơmât dêh char Khánh Hòa đei 2 apŭng Khánh Sơn păng Khánh Vĩnh. Atŭm hăm ‘nŏh, pơih trong tơƀưh hăm dôm apŭng groi kông kơ dêh char Ninh Thuận, Lâm Đồng, pơyoă ăn tơdrong atŏk tơiung mŭk drăm păng hơtŏk jơhngâm vei sơ đơ̆ng tĕh đak.