Jơ apinh jet păng tơl nơ̆r apinh jet pơgơ̆r đơ̆ng pơgê hei 21/8 truh đĭ pơgê tơning ‘năr 22/8. Pơgê hei, đơ̆ng rŏng kơ ƀok Kơdră Quốc hội Trần Thanh Mẫn pơma nơ̆r pơih blŭng hop akŏm, Tổng Thư ký Quốc hội, Kơdră vei lăng Anih pơvih ăn Quốc hội Bùi Văn Cường pơre hla ar achih tơroi găh tơdrong hơlen năng đơ̆ng Anih vei lăng hơdrĕch kon kông, dôm anih jang kơ Quốc hội, tơroi nơ̆r pơma đơ̆ng Anih chih tơdrong hơpơi ‘mĕh kon pơlei mưh bơ̆ jang dôm tơdrong tơchơ̆t đơ̆ng Anih chĕp kơ̆l pơgơ̆r Quốc hội găh dăr lăng kiơ̆ tơdrong jang păng apinh jet đơ̆ng blŭng jăl jang kơ Quốc hội jăl XV truh đĭ sơnăm 2023.

Đơ̆ng rŏng kơ ‘nŏh, dôm bơngai tang măt Quốc hội vă apinh jet đe ƀok kơdră, bơngai chĕp kơ̆l anih jang găh bơ̆ jang dôm tơdrong tơchơ̆t đơ̆ng Anih chĕp kơ̆l pơgơ̆r Quốc hội mưh dăr lăng kiơ̆ tơdrong jang păng apinh jet đơ̆ng blŭng jăl jang kơ Quốc hội jăl XV truh đĭ sơnăm 2023 hăm grŭp dôm tơdrong jang mă mônh, đei dôm tơdrong jang: Choh jang xa păng atŏk tơiung tơring tơrang; jang kơmăy, tĕch mơdro; jŏh ayŏ kơ dŏ xoang, tơplŏng kơdâu păng chă tơmang lăng.