‘Năr 8/9, tơ̆ Anih jang Trung ương Đảng, hăm tơdrong pơgơ̆r đơ̆ng Tổng bí thư Tô Lâm, tơpôl Anih tơm Chĭnh trĭ hlôi bơ̆jang hăm Khŭl chĕp kơ̆l pơgơ̆r Anih jang Đảng Kŏng an Trung ương vă ăn tơgop nơ̆r lơ̆m hla ar kăl păng trong jang rơih bơngai jang pơtruh ăn Hop akŏm bơngai tang măt Đảng bộ Kŏng an Trung ương ‘măng mă VIII, jăl jang 2025 - 2030. Tơ̆ jơ bơ̆jang, đơ̆ng rŏng kơ mơ̆ng Khŭl chĕp kơ̆l pơgơ̆r Anih jang Đảng Kŏng an Trung ương roi tơbăt, Anih tơm Chĭnh trĭ chih iŏk tơdrong hơmet ăn ‘lơ̆ng, kơchăng, hơlen, tơpăt đơ̆ng Anih jang Đảng Kŏng an Trung ương.

Roi tơbăt chĭnh trĭ đei hơmet ăn hơlen, tơpăt, ‘lơ̆ng, tôm tong, khoa hŏk, hơlen lăng tôm tơdrong pơtôch bơ̆jang kiơ̆ tơdrong Tơchơ̆t Hop akŏm jăl jang âu ki, tơƀôh rơđăh tơdrong ‘lơ̆ng, oei đei, tam mă ‘lơ̆ng, tơdrong tơm pơm ăn đơ̆ng dôm tơdrong tam mă ‘lơ̆ng păng ƀai hŏk hlôh vao; băt hơdăh trong jang, tơdrong hơgăt păng 3 grŭp tơdrong hơgăt găh tơdrong jang bơ̆jang, kơmăy kơmŏk sơđơ̆ng păng tơplih kơsô̆, jang tơgŭm, pơjing khŭl lĭnh păng jang tơbôl; 8 hơnăp jang tơm păng 3 tơdrong ‘lơ̆ng gĭt kăl đơ̆ng Anih jang Đảng Kŏng an Trung ương jăl jang truh... Anih tơm Chĭnh trĭ drơ̆ng nơ̆r hăm trong tơlĕch pơgơ̆r Hop akŏm bơngai tang măt Đảng bộ Kŏng an Trung ương ‘măng mă VIII. Kiơ̆ lơ̆m tơdrong pơtôch tơ̆ Hop akŏm, athei Khŭl chĕp kơ̆l pơgơ̆r Anih jang Đảng Kŏng an Trung ương chih iŏk dôm nơ̆r tơgop vă chih pơkeh tơdrong dôm hla ar kăl păng tơdrong jang rơih bơngai jang Hop akŏm; chĕp kơ̆l, pơgơ̆r jang ‘lơ̆ng tơdrong jang hơmet ăn; pơgơ̆r Hop akŏm jơnei ‘lơ̆ng hơiă.