‘Năr 11/9, tơ̆ Anih jang kơ Trung ương Đảng, hăm tơdrong pơgơ̆r đơ̆ng ƀok Tổng Bí thư Tô Lâm, Anih tơm Chinh trĭ bơ̆ jang hăm Khul kơdră chĕp kơ̆l Anih jang Đảng kơ Quốc hội vă tơgop nơ̆r ăn dôm Hla ar chih kăl, trong rơih hơmet bơngai jang păng hơmet ăn Hop akŏm bơngai tang măt Đảng ƀô̆ Quốc hội ‘măng mă I, jăl jang 2025 – 2030. Tơ̆ jơ bơ̆ jang, Anih tơm Chinh trĭ tơchĕng ‘lơ̆ng dôm hla ar chih kăl păng trong rơih hơmet bơngai jang đei Anih jang Đảng kơ Quốc hội hơmet tôch hơlen, tơpăt ‘lơ̆ng, trŏ hăm dôm tơdrong hơgăt păng nơ̆r pơtho đơ̆ng Trung ương; atŭm hăm ‘nŏh tơgop nơ̆r tôch hơlen vă chih tơmât dơ̆ng, hơmet pơ ‘lơ̆ng hla ar kăl ăn Hop akŏm.

Tổng Bí thư Tô Lâm pơma hơdăh lơ̆m jăl jang truh, Đảng ƀô̆ Quốc hội athei akŏm jơhngâm chĕp kơ̆l pơgơ̆r hơtŏk tơdrong jang tơiung pơjing Đảng rơgŏh ‘lơ̆ng, pran kơjăp rim tơdrong; tơplih ‘nao trong chĕp kơ̆l pơgơ̆r kiơ̆ trong jang ‘nao; adrin, jăh chih hơdăh trong jang, tơdrong pơgơ̆r, tơgŭm, gĭt kăl đơ̆ng Đảng jing trong chĕp kơ̆l pơgơ̆r, khôi luơ̆t vă bơ̆ jang kiơ̆ tơ̆ yăn âu. Tổng Bí thư athei, akŏm jơhngâm chĕp kơ̆l pơgơ̆r đang ‘lơ̆ng tơdrong pôk rơih Bơngai tang măt Quốc hội jăl XVI păng Bơngai tang măt Jơnŭm pơgơ̆r kon pơlei jơ̆p tơring jăl jang đơ̆ng 2026 - 2031. Pơgơ̆r bơ̆ jang ‘lơ̆ng hơnăp jang chih pơjing luơ̆t; chih pơjing luơ̆t jĭ tơdrong "tôch gĭt kăl", hơmet pơ 'lơ̆ng dôm tơdrong oei găn trong; akŏm jơhngâm pran, jên hu vă bơ̆ jang atŏk tơiung teh đak.