Tơ̆ jơ sơng pơma dơnuh, ƀok Nguyễn Xuân Thắng hlôi pơma dơnuh hăm trong iung jang kăl lơ̆m tơ iung pơjing Chủ nghĩa xã hội tơ̆ Việt Nam; pơma hơdăh, trong jang pơma dơnuh dih băl găh bơ̆ jang hơlen ‘nŏh jing tơm hloh lơ̆m tơgoăt tơgoăl ƀar Đảng; athei ƀar Đảng atŏk kơtang jang hơdoi, tơgop lơ̆m pơm lơ tơdrong tơgoăt tơgoăl jang hơdoi gĭt kăl kơtang Việt Nam păng Nhật Bản kơ yuơ rơngei hiôk hian păng pơdrŏng hơnŭk hơnoa tơ châu Á.

Ƀar păh pơma dơnuh rim trong jang hơdoi lơm khei năr kơnh, lơ̆m au drơ̆ng mĭnh nơ̆r vei kơjăp pơma dơnuh, ăn khul kơdră tơƀơ̆p dih băl; atŏk kơtang tơbăt dih băl kơtơ̆ng ang, trong jang hơ iă găh tơ iung pơjing Đảng, trong hơlen păng yan au găh tơ iung pơjing Chủ nghĩa xã hội, lơ̆m au iung jang jơnei trong jang Tơbăt dih băl trong bơ̆ jang ƀar Đảng; tơbăt dih băl kơtơ̆ng ang păng iung jang hơdoi kơjăp tơ̆ hop akŏm apŭng plĕnh teh păng lơ̆m tơring.