Ƀar ƀok kơdră atŭm hơlêm đon bơnôh đe linh vei xơđơ̆ng tơpôl kơ Việt Nam, tơgop hơtŏk păng kơhret hloh dơ̆ng tơdrong jang hadoi 'lơ̆ng rŏ đơ̆ng Việt Nam păng Australia, mă kăl noh găh tơdrong jang vei xơđơ̆ng tơpôl kơ Liên hơp kuôk. Jô̆ đơ̆ng 'măng mă blŭng vang jang vei xơđơ̆ng tơpôl kơ Liên hơp kuôk ăh xơnăm 2014, truh dang ei, Anih tơm Vei xơđơ̆ng tơpôl Việt Nam hlôi tơgŭm ăn kơ Đảng, Jơnŭm pơgơ̆r teh đak, Kuân wi Trung ương, Anih tơm pơgơ̆r Khul linh axong 533 'nu kang ƀô̆ sih kuan Khul linh păng 4 sih kuan kanh sat lơ̆m Anih tơm Kŏng ang vang jang vei xơđơ̆ng tơpôl tơ̆ Anih jang kơ Liên hơp kuôk păng dôm anih jang nai. Teh đak Australia jing minh lơ̆m dôm teh đak mă blŭng kĭ pơkăp Hla bar tơbăt hăm Việt Nam găh jang hadoi lơ̆m tơdrong Vei xơđơ̆ng tơpôl kơ Liên hơp kuôk ăh xơnăm 2015, pơm trong vă tơlĕch dôm tơdrong jang hadoi đei jơnei tơpă. Chơt hơ-iă truh tơmang Anih tơm jang Vei xơđơ̆ng tơpôl kơ Việt Nam, ƀok Kơdră kơpal teh đak Australia David Hurley xơkơ̆t Australia hơnơ̆ng lăp kơ đon jang hadoi hăm Việt Nam lơ̆m xơnong jang vei xơđơ̆ng tơpôl kơ Liên hơp kuôk.