Ăh tong anê̆ khei 2/2023, pơih xă tơdrong hơlen đơ̆ng mă tơdrong rôp gre chơ 21 hơdăn 'long tơ̆ tơring Hnam kơmăi unh hơyuh Đak Pi Hao 2 (tơkuh hăm apŭng Ia Pa), khul jang kơpal kơ apŭng Kông Chro, dêh char Gia Lai băt đei tơdrong koh phă 7 tơm 'long bri tơ̆ tơring bri 780 kơyuơ Kŏng ti jang găh Bri 'long Ia Pa vei lăng. Pơtoi kơ noh, anih jang kơpal ƀôh băt tơdrong phă bri tơ̆ tơring bri 792 kơyuơ Kŏng ti vei lăng Bri 'long Kông Hde vei lăng. Tơ̆ anih  đei tơdrong, kơ hrĕng tơm 'long trol, 'long tơpăh, 'long kăp gĭt 'nâu nai ƀơm koh ot, mă lơ 'long ot đei hlôi 'nhăk tơlĕch đơ̆ng bri. Tơblang găh tơdrong adar kơ ƀôh băt, tang găn tơdrong phă bri, ƀok Lê Văn Thuỷ - Kơdră Kŏng ti jang găh Bri 'long Kông Hde akhan đei tơdrong pơhơi lơ̆m tơdrong vei lăng: “Tơbang hơdăh hăm đe kang ƀô̆ mưh đei tơdrong kiơ noh athei tơroi hăm đe kơdră kŏng ti vă xek tơlang păng tơroi ăn kơ đe kơpal. Mă lei, lơ 'măng, kang ƀô̆, bơngai jang kơchĕng noh kon pơlei tơ̆ tơring iŏk 'long ot tơ̆r bơ̆ hnam noh adoi pơhơi pơhŏ"

Tơdrong mă bri ƀơm phă pơrăm adoi đei ƀôh tơ̆ lơ tơring nai tơ̆ Gia Lai, nhen Kbang, Chư Prông, Chư Sê… Ăh jê̆ đĭ khei 2/2023, khul jang kơpal kơ apŭng Kbang hơlen, ƀôh tơ̆ tơring 114, tơring bri kơ Kŏng jang găh bri ‘long Sơ Pai vei lăng đei 16 tơm ‘long bri tih đăl đơ̆ng 40cm-90cm ƀơm koh ot. Ƀok Nguyễn Văn Hợi – Kơdră Kŏng ti vei lăng bri ‘long Sơ Pai, apŭng Kbang tơroi: “Tơdrong jang vei lăng bri lơ̆m dôm xơnăm kơ âu ƀơm lơ tơnap tap. Khul jang vei lăng bri noh tơnap chă đei tôm bơngai. Kon pơlei ‘meh muih choh pơm jang dơ̆ng tơ̆ hơgăt teh mă kŏng ti vei lăng, dang ei đei bri ‘nao pơtăm. Kon pơlei muih choh mơ̆t truh teh bri, pơm tơnap tap ăn kŏng ti, đei tơm ‘long ưh đei kơjă kăp chă yua mă lei đe adoi kot ot noh pơjing hê̆ anih đei tơdrong hli”.

Mă kăl, ăh blŭng 3/2023, khul Kŏng ang dêh char Kon Tum hlôi ƀôh đei lơ tơngơ̆l ‘long hlôi đei ot jing tơ̆r lơ̆m cham chuơh jih đak krong Đăk Pxi, lơ̆m xăh Đăk Pxi, apŭng Đăk Hà. Anih tơm kôch chuơh, rơga âu noh kơ Kŏng ti jang 87. Lơ̆m kơsô̆ tơ̆r âu đei khul Kŏng ang ƀôh 2 hlak tơ̆r hlôi ot tơpăt, 4 hlak tơ̆r hơpuơ̆l, 11 tơngơ̆l ‘long ‘nao ot đang păng 5 tơngơ̆l ‘long hlôi tong đunh lơ̆m đak. Tôm ‘long bri âu đei đăl păng tơnor tih xă. Vă kơlĭp măt khul jang kơpal noh khul tơtong ‘long bri ôn ‘long bri hăm trong ƀŭ hlơp tơ̆ hơla chuơh. Mă lei đei minh ƀar hlak tơ̆r pơtơm koh ot đơ̆ng bri noh khul tơtông on ăh chuơh ră mă lei ưh đei hlơp dăh mă tam tom chă ôn păng chơ ‘nhăk.

Tơrĕk hloh noh anih ôn ‘long bri hơla chuơh ataih đơ̆ng Anih jang vei lăng kon pơlei xăh pơhlom hloh 1km chŏng mă jơnŭm pơgơ̆r tơring ưh kơ băt kiơ hloi. Ƀok Trần Phước Tuấn, Kơdră Anih jang vei lăng kon pơlei xăh Đăk Pxi xơkơ̆t: adrol kơ khei năr khul Kŏng ang ƀôh băt anih ôn ‘long bri âu, jơnŭm pơgơ̆r xăh hơnơ̆ng chă hơlen, dăr juang păng tơdrong vei lăng bri ‘long noh xơđơ̆ng ưh đei tơdrong kiơ ôh:

“Xăh adoi akŏm dôm Khul vang jang hơnơ̆ng chă dăr juang, vei lăng bri ‘long adoi nhen pơjing 2 anih oei hơlen tơ̆ 2 jăl trong tơm mơ̆t lĕch noh Jăl trong tih 677 păng jăl trong veh ver kơ đak hơbông. Khei năr âu ki noh tơdrong vei lăng bri ‘long xơđơ̆ng ƀiơ̆ tơ̆ tơring, ưh đei tơdrong kiơ truh ôh”.

‘Nguaih kơsô̆ tơ̆r ot mă khul jang kơpal ƀôh băt lơ̆m cham chuơh kơ Kŏng ti jang 87 găh jih đak krong Đăk Pxi, lơ̆m xăh Đăk Pxi, apŭng Đăk Hà, oei đei lơ ‘long bri tam mă ot jing tơ̆r đei ôn lơ̆m pơgar kơsu ataih đơ̆ng noh pơhlom 300m, hăm 2 anih ‘măn akŏm ‘long bri. Tơ̆ anih akŏm mă mônh đei 7 tơngơ̆l ‘long. Tơ̆ anih akŏm mă 2 đei 4 tơngơ̆l ‘long tih, iĕ phara băl. Kiơ̆ minh ƀar kơtơ̆ng ang tơbang, kơsô̆ ‘long bri lơ̆m pơgar kơsu noh ‘long bri kơyuơ khul tơtông ‘long bri ôn klenh lơ̆m cham chuơh kơ Kŏng ti jang 87 găh joh đak krong Đăk Pxi.

Ăh mă tơroi truh kơsô̆ ‘long bri đe tơtông, khul jang kơpal rôp vei, noh kơdră Anih jang vei lăng ‘long bri dêh char Kon Tum adrô̆ tơroi găh kơsô̆ ‘long bri đei 6 hlak tơ̆r hlôi ot, 11 tơngơ̆l ‘long ‘nao koh ot păng 5 tơngơ̆l ‘long hlôi tong đunh lơ̆m đak ‘măn ôn ăh cham chuơh, ưh đei tơroi truh kơsô̆ ‘long bri mă khul tơtông pơdŭ ‘nhăk đơ̆ng pơgar kơsu. Ƀok kơdră âu adoi ăn tơbăt, dang ei tơdrong đei ƀôh âu tŏk bŏk oei đei khul Kŏng ang pơtoi chă hơlen vă pơm hơdăh, găh khul jang vei lăng bri ‘long đei xơnong jang hadoi noh ưh đei kơtơ̆ng ang hơdăh găh kơsô̆ ‘long bri mă hlôi ƀơm akŏm iŏk.

Pơih xă tơdrong hơlen, khul jang kơpal dêh char Kon Tum mă blŭng hlôi ƀôh băt lơ̆m Tơring bri 327, xăh Đăk Pxi đei 22 tơm ‘long ƀơm koh ot. Mă lei tam mă xơkơ̆t hơdăh kơsô̆ tơm ‘long ƀơm koh ot tơ̆ bri păng kơsô̆ tơ̆r ot đei ôn tơtong lơ̆m cham chuơh hăm đei tơrĕk dih băl ưh. Tơdrong tŏk bŏk đei khul jang kơpal kơ dêh char Kon Tum pơtoi hơlen pơm hơdăh.