Kiơ̆ Tơchơ̆t, Anih juăt jang Tĭnh wi Kon Tum pơkăp pôk ƀok Xiêng Thanh Phúc, jang lơ̆m Tĭnh wi, Ƀĭ thư anih jang đoan dêh char Kon Tum tŏk Kơdră anih jang Tĭnh wi. Ƀok Xiêng Thanh Phúc, hơdrung Giẻ- Triêng, rơneh xơnăm 1983 tơ̆ xăh Đăk Nông, apŭng Ngọc Hồi, dêh char Kon Tum. Ƀok Xiêng Thanh Phúc vang jang Đoan đơ̆ng xơnăm 2008 păng hŏk đang Thak sih găh vei lăng tơdrong jang kơ teh đak. Đơ̆ng xơnăm 2016 truh dang ei jang Ƀĭ thư anih jang đoan dêh char Kon Tum.  Pơma ăh iŏk jang Kơdră anih jang Tĭnh wi Kon Tum, ƀok Xiêng Thanh Phúc hmach bơnê kơ tơdrong lui ngeh đơ̆ng Anih juăt jang Tĭnh wi Kon Tum păng pơkăp gô hơnơ̆ng pơ-'lơ̆ng đon bơnôh pơhrăm tơdrong pơm jang vă keh đang tơnăp tơdrong jang đei pơjao. Adrol kơ noh ăh năr 30/3, Anih juăt jang Tĭnh wi Kon Tum hlôi pơm Lêh tơbang păng pơjao Tơchơ̆t axong jang păng tơchơ̆t ƀok Thái Văn Tưởng, jang lơ̆m Tĭnh wi, Kơdră anih jang Tĭnh wi tŏk jang Ƀĭ thư hwên wi Đăk Glei.