Đơ̆ng hơtuch sơnăm sơ̆ truh dang ei, mưh kơmăng jur, trong bê tông pơm dăr plei Nú, xăh Ia Nan, dêh char Gia Lai ƀrŭng ƀrăng ang hơdăh gơnơ̆m đơ̆ng unh điên măt ‘năr. Đe hơioh pơđeng pơm ngôi, bơngai ‘lŏ brŏk đơ̆ng mir kŭm đei trong hơdăh, yak vih hiôk sơđơ̆ng. Tơ̆ kơmăng unh điên tơ̆k hơdăh trong, oh H’Oanh kŭm hăm bôl boăl oei yak ngôi tơ̆ trong năm tơ̆ hnam hŏk hôk pơlei chơt hơiă pơma: “Adrol ki tam mă đei unh điên măt ‘năr yoa công ty tơgŭm ‘nŏh nhôn drŏ kăn ưh pơ̆n lĕch tơ̆ trong, yoa hli. Đơ̆ng đei unh điên nhôn ƀôh tôch hơđơ̆ng jơhngâm”.

Kŭm hăm Ia Nan, lơ xăh tơter tơring sơlam găh Pơmât dêh char Gia Lai kŭm đei dôm anih jang găh Binh đoàn 15 tơlĕch tơdrong jang “Sơnglŏng tơ̆k hơdăh pơlei pơla”. Sơnăm 2024, Binh đoàn tơlĕch jên răt hơmet unh điên vă chô̆ tơ̆k hơdăh tơ̆ 23 km trong, akŏm đĭ đăng jên jang hlŏh 1,5 ti. Truh sơnăm 2025, jăl 2 kơ tơdrong jang đei chô̆ ăn lơ pơlei pơla pơmat tat tơ̆ tơring sơlam, hăm trong kơjung loi 10km. Tơ̆ xăh Ia Mơr, kră pơlei Ksor H'Blâm chơt hơiă pơma: “Kră pơlei tôch hơiă, mih ma duch nă kŭm hơiă ‘năi, trong đei unh điên tơ̆k hơdăh bơih. Năm jang, kăt kơtăk cao su, dăh mă năm tơ̆ âu tơ̆ to đei điên tơ̆k hơdăh tơ̆ trong ƀrach, tôch hơiă”.

Đại tá Nguyễn Chí Kiên – Bí thư chĕp kơ̆l Đảng, Phŏ Kơdră vei lăng Công ty 72, Binh đoàn 15 ăn tơbăt, dôm tơdrong jang tơ̆k hơdăh trong hăm unh điên măt ‘năr ưh lăp tơgŭm ăn pơlei pơla tơ̆ tơring tơrang roi ‘lơ̆ng rŏ, tơgŭm ăn tơring pơjing đei tơdrong arih xa ‘nao ‘lơ̆ng hơiă păng jang đei dôm tơdrong hơgăt pơjing tơring tơrang ‘nao đĕch mă oei tơgop vei kơjăp tơdrong sơđơ̆ng, tang găn tơdrong pơm glăi lơ̆m tơpôl păng tơjur ƀiơ̆ gre tâm preh băl: “Đơ̆ng đei dôm tơdrong jang sơnglŏng tơ̆k hơdăh pơlei pơla tơ̆ dôm tơring đei anih jang đơ̆ng Binh đoàn 15 ‘nŏh vang tơgop ‘lơ̆ng ăn tơdrong vei lăng sơđơ̆ng tơpôl, pơm ‘lơ̆ng ăn tơdrong yak vih vât tơ̆ trong”.

Đơ̆ng dôm kơƀŏng unh điên, tơdrong jang “Sơnglŏng tơ̆k hơdăh pơlei pơla” ưh lăp tơ̆k hơdăh trong pơlei đĕch, mă oei tơ̆k hloi đon lui, hơmĕng kơ mĭnh tơdrong arih xa ning mônh kơnh phĭ tơtŏ dơnŏ ‘lơ̆ng; jing tơdrong hơiă hlŏh tơƀôh hơdăh tơdrong pơvei đơ̆ng linh hăm kon pơlei, tôch kơjăp ‘lơ̆ng tơ̆ tơring sơlam Gia Lai.