Đơ̆ng rŏng teh đak rơngei keh kong, ƀok Lê Minh Đuông hơnơ̆ng tơgop kơtang ‘noh bơngai kang ƀô̆ tơnăp hăm tơring hăm lơ kơchư̆k jang. Mă đơ̆ng bơ̆ jang yă kiơ, ƀok jei ling lang jang đĭ jơhngơ̆m đon vă pơjing đei tơdrong hơrih sa hiôk chơt ăn kon pơlei, hơnhăk pơlei pơla Hồ Đắc Kiện hơnơ̆ng tơplih ‘nao. Mĭnh lơ̆m dôm tơdrong gĭt kăl hloh kơ ƀok ‘noh jơ ‘năr ou ‘noh atŏk kơtang bơ̆ jang pơnơ̆t đak vă choh jang sa ‘lơ̆ng hơ iă groi teh thŭng, pơjing rơvơn ăn kon pơlei jang chŭn na ƀa đak ƀar pơyan lơ̆m sơnăm. Gơnơm đơ̆ng noh, kon pơlei jang sa iŏk đei lơ hloh, pơlei pơla roi năr roi tơplih hơ iă, choh jang sa jei roi năr roi tơdrong jang tơm pran kơtang kơ tơring Hồ Đắc Kiện dĭng truh dang ei. Ƀok Lê Minh Đuông hơdơ̆r dơ̆ng.“Hồ Đắc Kiện lơ̆m jơ ‘năr đơ̆ng rŏng teh đak rơngei ‘noh groi teh thŭng, teh prăh prang, kon pơlei lăp băt chă rôp ka hơdang, jang chŭn na ưh kơ jing ‘lơ̆ng, kơna pă bĭ bu ‘meh vă jang sa, lơ̆m mĭnh sao kĕch yoă iŏk đei 5- 6 reo ƀa. Ĭnh ‘noh jĭ bơngai vang iung jang blŭng hloh lơ̆m hơmet pơ ‘lơ̆ng teh jang sa tơ̆ Hồ Đắc Kiện, lăng tơdrong pơm pơnơ̆t đak vă choh jang sa ƀar pơyan. Đơ̆ng sơnăm 1976 truh 1985, lơ̆m mă noh sơ̆ ba jang Kơ iĕng Kơdră chĕp pơgơ̆r, đơ̆ng rŏng ‘noh jang Kơdră chĕp pơgơ̆r Hơnih vei lăng kon pơlei tơring hlôi atŏk kơtang hơmet pơ ‘lơ̆ng groi teh jang sa ou, pơtho ăn kon pơlei jang sa, hơmet pơ ‘lơ̆ng choh jang sa kiơ̆ trong tơlĕch ăn đơ̆ng khul kơdră Teh đak”.

Sơnăm 2012, ƀok Đuông pơdơ̆h bơ̆ jang, ma wlei jơhngơ̆m đon “Ƀô̆ đô̆i Ƀok Hô” lơ̆m ƀok oei ưh kơ lai sơ kơtĕch. Ưh kơ ‘meh pơdơh pơdei, ƀok Lê Minh Đuông, mă đơ̆ng jĭ rơka kơtang đơ̆ng tơblăh vang pơm ăn, jĭ jăn lơ̆m khei ‘năr tơngiĕt, ƀok oei kơrŭn đĭ ai iung jang dôm tơdrong jang lơ̆m ăp, lơ̆m tơring. Vă atŏk kơtang jang kiơ̆ tơring groi teh să gơh choh jang sa, mă kăl jang ƀa, ƀok chă pơrô̆ pơrôp kon pơlei jang chŭn na ƀa đak akŏm mĭnh ƀôt, rei pơtăm ƀa tĕch mơdro ‘moi kiơ̆ pơjing khul jang hơdoi choh jang sa. Đơ̆ng trong jang hơdoi ou, kjon pơlei đei hŏk pơhrăm jang kiơ̆ khoa hŏk kih thuơ̆t, rei pơtăm hơdrĕch ƀa ‘lơ̆ng, phŏng rei, kih thuơ̆t choh jang sa, mă kăl đei pơkăp răt iŏk pơ đĭ ƀa, ƀa lei lơ, kơjă sơđơ̆ng, jang sa iŏk yoa kơjăp. Ƀok Đuông tơroi dơ̆ng: “Dang ei ƀa plei lơ bơih, lơ̆m 1ha đơ̆ng 6-8 tân, mă kăl tơdrong choh jang sa kơ kon pơlei dang ei hlôi gơh hơgei, kơna ƀa plei hơnơ̆ng. Hăm khoa hŏk kih thuơ̆t ‘noh kon pơlei jang kiơ̆, rŏ năng vă pơma dang ei đei hloh 80% kon pơlei hlôi băt jang ƀa gơh hơgei”.

Tơdrong tôch kơ lui hăm ƀô̆ đô̆i rơka Lê Minh Đuông ‘noh mă đơ̆ng ƀok hlôi 70 sơnăm, mă lei rim năr ƀok oei hơnơ̆ng yak hơdoi hăm kon pơlei năm lăng chŭn na, chă pơma dơnuh dih băl trong jang sa, pơtho tơbăt kih thuơ̆t ăn jơhnơr mơlôh. Ƀok jĭ bơngai pơm jŭk yŭk trong hơlou lơ̆m jang kiơ̆ kih thuơ̆t gơh hơgei lơ̆m choh jang sa, mă kăl dôm tơdrong jang chŭn na ƀa đak hăm kmăi kmŏk ngăl kơna pơyan ayơ jei đei ƀa lơ, iŏk đei jơnei kơtang.

Ưh khan lăp bơngai ƀô̆ đô̆i tơnăp ‘lơ̆ng, ƀok oei jing bơngai kang ƀô̆ ‘lơ̆ng, bơbgai kon pơlei choh jang sa hơgei păng jing bơngai hơdăh ang rang ‘lơ̆ng ăn jơhnơr mơlôh kiơ̆ yok rok jơ̆ng. Dôm tơdrong yă kiơ mă ƀok Lê Minh Đuông hlôi păng tŏk bŏk iung jang ưh khan lăp tơƀôh hơdăh ăn jơhngơ̆m đon “Ƀô̆ đô̆i rơka mă lei ưh kơ răm ƀăm”, mă oei jing tơdrong tơroi hơ iă găh hơdrin hơrih sa ‘lơ̆ng, jơhngơ̆m đon ‘mêm kơ eng teh đak păng tơdrong plang ăn ưh kơ pơdơh ăn pơlei pơla, teh đak. Hăm dôm tơdrong tơgop đơ̆ng kơdih, ƀok Lê Minh Đuông đei Đảng păng Teh đak pôk bơnê Mê đai jơnei tih tên tơblăh vang tang năm Mi dơ̆ng mă Ƀar, Kỷ niệm chương Vei lăng năng tông sơđơ̆ng Teh đak, Huy hiệu 50 sơnăm jang Đảng, atŭm hăm lơ hla bơar pôk bơnê anai ... Ƀok Nguyễn Văn Mỹ, Kơdră chĕp pơgơ̆r Hơnih vei lăng kon pơlei tơring Hồ Đắc Kiện, pơlei tơm Cần Thơ, tơbăt:“Khul Ƀô̆ đô̆i so’noh mĭnh lơ̆m dôm hơnih jang tôch kơ ‘lơ̆ng, lơ bơngai lơ̆m khul hlôi atŏk kơtang jang sa atŏk tơ iung mŭk drăm ŭnh hnam, lơ̆m ou đei lơ ƀô̆ đô̆i so găh lơ̆m dôm bơngai jang sa hơgei, pơm jŭk yuk trong hơlou atŏk tơ iung mŭk drăm, nhen jang ƀa lăng kơjăp dôm tơdrong gơ̆h hơgei, băt hlôh ƀôh hơdăh kih thuơ̆t, jang kiơ̆ kmăi kmŏk hamw trong tơlĕch ăn pơm tơjur kon jên tơmơ̆t jang, jang sa đei iŏk yoa kơjăp, đe sư ‘noh jĭ dôm bơngai yŭk tro hơlou vă kon pơlei hŏk pơhrăm păng kiơ̆ yok rok jơ̆ng”.

Hăm jơhngơ̆m đon “Ƀô̆ đô̆i Ƀok Hô”, “Ƀô̆ đô̆i rơka mă lei ưh kơ răm ƀăm” ưh khan lăp choh jang sa hơgei, ƀô̆ đô̆i so, ƀô̆ đô̆i rơka Lê Minh Đuông oei jing mĭnh ‘nu tơƀôh hơdăh ăn jơhngơm đon hơdrin yak hloh tơnap tap, jơhngơ̆m đon ‘mêm kơ eng teh đak păng hơpơi ‘meh vă plang đĭ jơhngơ̆m đon.