Tơ̆ jơ xơng, Thủ tướng Han Duck Soo bơnê kơ tơdrong tơbôl jang hadoi tôm tơdrong kơ 2 teh đak, lơ̆m noh hơtŏk tơmam drăm tĕch răt kơ 2 păh roi năr roi hơtŏk. Lơ̆m xơnăm 2022, hlôi đei hloh 700 rơbâu ‘nu bơngai Hàn Quốc năm truh Việt Nam tơmang pơhiơ̆ păng dang ei bơngai Hàn Quốc oei pơm jang tĕch pơdro tơ̆ Việt Nam roi năr roi lơ. Ƀô̆ trưởng Tô Lâm bơnê kơ Thủ tướng Han Duck Soo hlôi axong jơ xơng Khul, păng xơkơ̆t, Việt Nam ling lang lăng Hàn Quốc jing teh đak kăp gĭt lơ̆m rim tơdrong jang mŭk drăm, chĭnh trĭ, jang tơbôl, vei xơđơ̆ng tơpôl..., lơ̆m noh jang hadoi lơ̆m vei xơđơ̆ng tơpôl jing tơdrong tơm lơ̆m tơbôl kơ 2 teh đak; ră hơdăh, Việt Nam tơgŭm tơdrong rơngei xơđơ̆ng tơ̆ tơring păng lơ̆m kơpal teh, lơ̆m noh đei achon teh Triều Tiên.