Đơ̆ng rŏng kơ lêh xơng, ƀar ƀô̆ trương pơgơ̆r pơma đam. Xơng Khul kơpal tang măt ăn Anih tơm Nô̆i vŭ teh đak Cuba năm tơmang păng bơ̆ jang hăm Anih tơm Kŏng ang Việt Nam, Ƀô̆ trương Tô Lâm ră hơdăh, hăm tơdrong đei ƀôh lơ tơdrong yoch glăi, mă kăl noh tơdrong glăi găn lơ teh đak, pơm yoch găh kŏng ngê̆ kao păng dôm tơdrong pơm glăi găh tơroi tơbăt nai, roi năr roi tơnap kơ hơlen păng tang găn, tơdrong pơih xă hơtŏk jang hadoi kơ ƀar Anih tơm Kŏng ang Việt Nam păng Anih tơm Nô̆i vŭ Cuba roi kăl hloh, kơyuơ tơdrong pơyua păng vei xơđơ̆ng tơpôl kơ rim teh đak. Tơ̆ pơma đam, ƀar păh hlôi pơdrơ̆ng: Hơtŏk tơroi tơbăt tơdrong hlôh vao, hơmet kơmăi kơmŏk păng pơtho hlôh vao ăn kơ đe linh vei hơlen, mă kăl noh dôm kih thuơ̆t vei vêr nhen bơ̆ng hơlâu, tang găn tơdrong pơhlŭ pơm kơnê̆...; Tơlĕch jang hadoi hơlen pơm tơlĕch dôm kơluăi pơgang, vaccine, tơmam sinh hŏk, lơ̆m noh đei dôm kơluăi pơgang hlôi đei hơlen keh kong păng iŏk hơmet jĭ ăn bơngai jĭ jăn tơ̆ Cuba…