Jăl jang 2020 - 2025, Đảng bộ Anih vei lăng kon pơlei dêh char Đắk Lắk hlôi chĕp kơ̆l, pơgơ̆r tôm tong kiơ̆ trong jang kăl “rơđăh bơngai, rơđăh tơdrong, rơdăh iŏk yua”, pơm tơplih rơđăh ‘lơ̆ng lơ̆m rim tơdrong jang mŭk drăm, joh ayŏ, tơpôl, khŭl lĭnh - sơđơ̆ng. Mŭk drăm tŏk GRDP jô̆ păh lăp đei 6,24% 1 sơnăm; kơmăy kơmŏk pơm tơlĕch păng ŭnh hơyuh rơgoh jing hơnih hơdăh; tơmang lăng tơiung ming pran kơtang; jên tĕch tơmam tơ̆ teh đak đe tŏk jô̆ păh lăp 11,2% lơ̆m 1 sơnăm. Anih jang tơring kơmăy kơmŏk đei jang pơkeh, sơng đei lơ tơdrong jang tih, pơih ăn hơnih hơtŏk tơiung ‘nao.

Yak mơ̆t lơ̆m jăl jang 2025 - 2030, Đảng bộ Anih vei lăng kon pơlei dêh char Đắk Lắk tơlĕch ăn tơdrong jang tŏk GRDP jô̆ păh lăp đơ̆ng 11,5% lơ̆m 1 sơnăm tơ̆ kơpal; iŏk yua jô̆ păh lăp kơ̆l bơngai đei 160 triệu hlak jên 1 sơnăm; akŏm kơjă tĕch tơ̆ teh đak đe đei hloh 13 ti USD; sơng đei  43 triệu ‘nu tơmoi hăm iŏk yua dang 97.150 ti hlak jên; tơjur kơsô̆ ŭnh hnam dơnuh hin jô̆ păh lăp 2% lơ̆m 1 sơnăm, hơdrô̆ tơring kon pơlei kon kông jur 3% lơ̆m 1 sơnăm. Hơtŏk tơiung tơm ‘noh kơmăy kơmŏk, choh jang sa hăm kơmăy kơmŏk ‘nao, tơmang lăng păng mŭk drăm đak dơsĭ; tơklep hăm tơplih ‘lơ̆ng pran kơtang hơnih tơmơ̆t jên jang, pơtrŭt khoa hŏk kơmăy kơmŏk, tơplih ‘nao pơcheh hơgei, tơplih kơsô̆ păng hơtŏk tơiung bơngai jang gơh hơgei.

Ƀok Nguyễn Đình Trung, Bơngai jang lơ̆m Khŭl chĕp kơ̆l pơgơ̆r Trung ương Đảng, Bí thư Đảng dêh char Đắk Lắk pơma hơdăh, Hop akŏm ‘măng âu gô tơlĕch tơdrong ‘lơ̆ng ăn 1 jăl jang hơtŏk tơiung ‘nao, tơƀôh hơdăh hơnăp jang chông trong đơ̆ng Đảng bộ Anih vei lăng kon pơlei dêh char lơ̆m jăl trong bơ̆jang kiơ̆ ‘lơ̆ng hơpơi ‘meh pơdrŏng pran đơ̆ng Đắk Lắk.

“Đảng ủy Anih vei lăng kon pơlei kăl athei pơgơ̆r bơ̆jang kiơ̆ tơpăt dôm trong jang đơ̆ng Trung ương păng jang kiơ̆ dôm tơdrong hơgă kiơ̆ Tơdrong tơchơ̆t đơ̆ng Anih jang Đảng dêh char vă hơnơ̆ng tơlĕch jang hrơ̆ch, tôm tơdrong păng iŏk đei jơnei ‘lơ̆ng, mă loi ‘noh jĭ vei sơđơ̆ng tơdrong hơgăt jang tŏk 8% tơ̆ kơpal lơ̆m sơnăm 2025, pơm tơdrong ‘lơ̆ng vă iŏk đei tơdrong hơgăt jang tŏk 2 kơsô̆ lơ̆m jăl jang truh. Tŭn pran dôm tơdrong jang pơtrŭt tơmơ̆t jên jang, hơnơ̆ng bơ̆jang kiơ̆ dôm trong jang kơtang vă tŭn hrĕnh tơlĕch jên jang teh đak, mă loi ‘noh jĭ dôm tơdrong jang tơm. Tơtom hơmet pơ ‘lơ̆ng pơmat tat pơm jên jang pơtrŭt hơtŏk tơiung mŭk drăm tơpôl lơ̆m jăl jang ‘nao”.

Đảng bộ Anih vei lăng kon pơlei dêh char Đắk Lắk băt hơdăh tơdrong hơgăt akŏm lơ̆m jăl jang ‘nao 2025 – 2030 ‘noh jĭ: Hơtŏk ‘lơ̆ng kĕ jang chĕp kơ̆l, jơhngơ̆m iung jang đơ̆ng Đảng bộ; 1 jơhngơ̆m đon bơ̆jang kiơ̆ jơnei tơdrong hơgăt hơnăp jang truh sơnăm 2030. Tŭn pran hơmet ming bơ̆jang, tơplih ‘lơ̆ng pran kơtang hơnih tơmơ̆t jên jang tĕch mơdro, pơtrŭt mŭk drăm kơdih hơtŏk tơiung, hơtŏk ‘lơ̆ng bơngai jang; hơtŏk loi dơ̆ng tơdrong jang vei lăng tơmam drăm păng vei lăng cham char; hơtŏk tơiung pran kơtang khoa hŏk - kơmăy kơmŏk, tơplih ‘nao hơgei, tơplih kơsô̆; akŏm hơtŏk tơiung mŭk drăm tơklep hăm tơplih kơsô̆, tơplih rơgoh, tơgop pơjing dêh char Đắk Lắk sơđơ̆ng, hơtŏk tơiung, pơdrŏng ‘lơ̆ng, hơgei, kơjăp lui ngeh kŭm hăm teh đak yak mơ̆t lơ̆m chăl ‘nao - chăl jang tŏk đơ̆ng hơdrĕch hơdrŭng Việt Nam”.