Sơng iŏk nơ̆r hơvơn đơ̆ng Kơdră teh đak bơ̆n Lương Cường păng Hơkăn ƀok, ƀok pơtao teh đak Bhutan 'noh Jigme Khesar Namgyel Wangchuck păng Hơkăn ƀok pơtao hlôi truh Hà Nội pơtơm năm tơmang kơpal truh teh đak Việt Nam đơ̆ng năr 18 truh năr 22/8.

Jô̆ đơ̆ng khei năr iung jang tơbôl, Việt Nam hơnơ̆ng lăng tơgĭt tơdrong jang tơbôl hăm Bhutan, lăng Bhutan jĭ minh lơ̆m dôm teh đak yuk hơlou lơ̆m tơdrong pơm kiơ̆ pơkăp hơtŏk tơ-iung jơk, vei sơđơ̆ng dôm pơkăp "jơnap." Lơ̆m kơplah noh, Bhutan lăng Việt Nam jĭ minh lơ̆m dôm teh đak kăl hloh vă hơtŏk jang tơbôl adoi nhen hơpơi 'meh hŏk hơlen tơdrong hlôh vao lơ̆m hơtŏk tơ-iung đơ̆ng Việt Nam. Kiơ̆ pơkăp jang tơbôl 'lơ̆ng rŏ, 'măng năm tơmang đơ̆ng Ƀok Pơtao tơƀôh tơdrong lăng tơgĭt đơ̆ng Bhutan hăm tơdrong tơbôl jang hơdoi kơ 2 teh đak, adoi nhen sơnong jang, anih dơ̆ng kơ Việt Nam tơ̆ tơring; atŭm hăm noh tơƀôh tơdrong lăng tơgĭt đơ̆ng Việt Nam hăm Bhutan. 'Măng năm tơmang vă hơtŏk jang tơbôl 2 teh đak kơjăp hloh, tơnăp hloh, hơtŏk dôm tơdrong jang mŭk drăm kơ 2 teh đak lơ̆m khei năr truh.