Pơgê năr 27/8, Anih jang vei lăng kon pơlei dêh char Gia Lai jăl 12, jăl jang 2021-2026 hlôi pơgơ̆r ‘Măng hop akŏm mă 21 vă keh đang kơchư̆k Kơdră Anih jang vei lăng kon pơlei dêh char. Ah hop akŏm, ƀok Hồ Văn Niên – jang lơ̆m Ƀan châ̆p hanh Trung ương Đảng, Ƀĭ thư Tĭnh uy, Kơdră Hô̆i đŏng kon pơlei dêh char Gia Lai, tang măt ăn Anih jang Kơpal dêh char, hlôi pơtruh hla bar chih hơnăn bơngai jang Kơdră Anih jang vei lăng kon pơlei dêh char Gia Lai jăl 12, jăl jang 2021-2026.

Kiơ̆ kơ noh, ƀok Rah Lan Chung – Phŏ Ƀĭ thư Tĭnh uy Gia Lai jăl jang 2020-2025, tang măt lơ̆m Hô̆i đŏng kon pơlei, đei pôk jang Kơdră Anih jang vei lăng kon pơlei dêh char Gia Lai jăl jang 2021-2026. Đơ̆ng rŏng kơ noh, ƀok Rah Lan Chung hlôi đei rim bơngai jang tang măt ăn Hô̆i đŏng kon pơlei dêh char pôk iŏk jang Kơdră Anih jang vei lăng kon pơlei dêh char Gia Lai hăm 100% kơsô̆ kơphĭu pôk.