‘Nâu jing ‘măng mă blŭng ƀok Tổng Bí thư, Kơdră teh đak bơ̆n vang năm Hop akŏm kơpal kơ dôm teh đak đei yua nơ̆r Phalăng păng đei ƀai đŏk kăp gĭt, tơgop pơlan să kơtang hloh dơ̆ng tơroi tơbăt kơ minh Việt Nam kơchăng, hơbĕch hơbal, tơnăp hăm sơnong jang păng hơnơ̆ng kơchăng atŭm hăm jơnŭm jang apŭng plenh teh tơjră hăm dôm tơdrong tơnap tap, tơgop ăn khei năr hơnô̆ hơnăp kơnh “rơngei, tơbôl, tơguăt tơguăl păng hơtŏk tơ-iung kơjăp sơđơ̆ng”, nhen tơchơ̆t mă hop akŏm tơlĕch pơkăp.

Lơ̆m kơplah noh, ‘măng năm tơmang teh đak Phalăng vă hơtŏk tơdrong jang tơbôl kăp gĭt kơ 2 teh đak tŏk minh jăl ‘nao, pơm jang kơjăp hloh tơgăl hăm anih dơ̆ng kơ 2 teh đak lơ̆m tơring păng lơ̆m apŭng plenh teh. ‘Măng năm tơmang đơ̆ng Ƀok Tổng Bí thư, Kơdră teh đak bơ̆n Tô Lâm tơgop hơtŏk kơjăp hloh dôm tơdrong jang tơbôl đơ̆ng Việt Nam hăm teh đak Phalăng păng jơnŭm jang kơ dôm teh đak đei yua nơ̆r Phalăng.