Ƀok Tổng Bí thư, Kơdră teh đak bơ̆n Tô Lâm hlôi truh hơpeh hơpong, hơlêm, asong tơmam ăn kon pơlei tŏk bŏk oei akŏm tơ̆ Hnam joh ayŏ thôn Phú Thọ 1, xah Trường Sinh, apŭng Sơn Dương, dêh char Tuyên Quang. Ƀok Tổng Bí thư, Kơdră teh đak bơ̆n Tô Lâm hơpơi ‘meh kon pơlei tơ̆ âu pơtoi tơgŭm dih băl vă sơđơ̆ng tơdrong hơrih. Pơtoi kơ noh, ƀok Tổng Bí thư, Kơdră teh đak bơ̆n Tô Lâm hlôi kơtă năm hơlen tơdrong jang tang găn păng chă trong hơmet hăm tơdrong đak hơbông pơrăm hơbong pơnơ̆ dơnâu đak, năm hơpeh hơpong kon pơlei hơrih tơ̆ jih đak krong Lô lơ̆m tơring teh kơ apŭng Sơn Dương.

Pơgơ̆r ‘măng pơm jang hăm đe kơdră dêh char Tuyên Quang gah tơdrong jang tang găn păng tơjră đak hơbông tơ̆ tơring, ƀok Tổng Bí thư, Kơdră teh đak bơ̆n Tô Lâm athei kơchăng chă hơlen ling lang tơ̆ dôm anih hli hlơt ƀônh răm hăm dơnâu hơbong đak; dah đei trong jang vă pơro đak hơbông gơh och, hơmet dôm anih răm hăm hơbong dơnâu đak; kơchăng yông ‘nhăk kon pơlei jăk oei tơ̆ anih sơđơ̆ng; tơlĕch tơtenh dôm tơdrong jang tơgŭm dŏng sar bar, tơgŭm tơmam drăm xa tơtom. Kơmăng năr 12/9, tơ̆ pơlei tơm Việt Trì, ƀok Tổng Bí thư, Kơdră teh đak bơ̆n Tô Lâm hlôi pơm jang hăm đe Kơdră kơpal kơ dêh char Phú Thọ păng tơmơ̆ng dôm tơdrong pơtruh, pơkăl đơ̆ng dêh char lơ̆m tơdrong chă hơmet răm kơyuơ ‘mi kial đak hơbông pơrăm.