‘Nâu jing ‘măng năm tơmang kơpal mă blŭng truh teh đak Ireland đơ̆ng Kơdră teh đak Việt Nam jô̆ đơ̆ng mă 2 teh đak iung jang tơbôl, kiơ̆ đơ̆ng noh tơgop hơtŏk đon lui gah jang chĭnh trĭ păng hơmet pơ-‘lơ̆ng tơdrong jang tơbôl Việt Nam-Ireland. 

‘Măng năm tơmang đơ̆ng ƀok Tổng Bí thư, Kơdră teh đak bơ̆n Tô Lâm truh Ireland sơkơ̆t hơdah Việt Nam lăng tơgĭt tơdrong jang tơbôl hăm Ireland, tơgop hơtŏk đon lui gah chĭnh trĭ, kơhret hloh dơ̆ng tơdrong jang hadoi lơ tơdrong kơ 2 teh đak lơ̆m khei năr truh, mă kăl lơ̆m tơdrong jang mŭk drăm, tĕch pơdro, asong jang, khua hŏk kŏng ngê̆, tơplih ‘nao gơh hơgei, jang pơtho pơhrăm, choh jang xa; kiơ̆ tơchơ̆t hơtŏk tơ-iung kơjăp sơđơ̆ng, rơngei hiôk hian, jang hadoi păng hơtŏk tơ-iung tơ̆ tơring păng lơ̆m apŭng plenh teh.