Pơma ah jơ lêh, ƀok Tổng Bí thư, Kơdră teh đak bơ̆n Tô Lâm ră hơdah, năr 2/9/1945, tơ̆ Cham akŏm Ba Đình kăp gĭt, Ƀok Kơdră Hồ Chí Minh hlôi đŏk tơbang Tơchơ̆t hăm apŭng plenh teh gah tơdrong rơngei pơgơ̆r kơdih păng tơ-iung pơjing teh đak Việt Nam Dân chủ kŏng hoa, dang ei noh teh đak Kŏng hoa xah hô̆i chuh nghia Việt Nam.

Lơ̆m 79 sơnăm kơ âu, hăm tơdrong pơgơ̆r đơ̆ng Đảng, yak kiơ̆ nơ̆r krao hơvơn đơ̆ng Ƀok, ang bang nơ̆r Sơkơ̆t rơngei hiôk hian, hăm pơkăp “Ưh đei kiơ gĭt hloh kơ tơdrong rơngei hiôk hian”, tôm kon pơlei Việt Nam hlôi tơguăt tơguăl minh đon minh bơnôh, tôm bơngai nhen minh, atŭm tơguăt hăm kon pơlei lơ̆m apŭng plenh teh, hơ-‘nhăk kăch mang Việt Nam đei iŏk lơ tơdrong jơnei, pơrơngei hơdrung hơdrĕch, rơngei teh đak, pơm jang đei jơnei dôm tơdrong tơplih ‘nao, hơyak kơjăp tŏk jang chuh nghia xah hô̆i. Ƀok Tổng Bí thư, Kơdră teh đak bơ̆n sơkơ̆t hơdah, đei iŏk jơnei kăp gĭt đơ̆ng rŏng 79 sơnăm tơ-iung pơjing teh đak, noh kơyuơ đon băt kơ teh đak, tơguăt tơguăl tôm kon pơlei, kơ-‘nôh vă đei jơnei rơngei hiôk hian đơ̆ng Đảng, Teh đak păng kon pơlei Việt Nam.