Tang măt ăn đe kơdră Đảng, Teh đak, ƀok Tổng Bí thư, Kơdră teh đak bơ̆n Tô Lâm thơ thâu hơ-iă hăm ƀok Nguyễn Minh Tâm đei pôk jang Kơdră tang măt ăn teh đak Việt Nam tơ̆ Lào. Pơjao sơnong jang ăn Kơdră tang măt đei pôk, ƀok Tổng Bí thư, Kơdră teh đak bơ̆n Tô Lâm ră hơdah, Việt Nam păng Lào jing 2 teh đak tơjê̆ tơguăt kơjăp hăm dih băl; đei sơnong jang kăp gĭt hăm tơdrong vei sơđơ̆ng tơpôl păng hơtŏk tơ-iung kơ Việt Nam, atŭm hăm noh adoi jing tơdrong asong jang tơm lơ̆m tơchơ̆t jang tơbôl kơ Việt Nam.

Ƀok Tổng Bí thư, Kơdră teh đak bơ̆n hơpơi ‘meh ƀok Nguyễn Minh Tâm  iŏk sơnong jang kơ po noh kơdră jang tang măt, jing gơng tơroh tơgŭm hơtŏk tơguăt kăp gĭt Lào - Việt Nam, pơđĭ gah jang chĭnh trĭ - jang tơbôl, jang mŭk drăm – tĕch pơdro, joh ayŏ păng tơmang pơhiơ̆ hloi, hơtŏk anih jang mŭk drăm pran păng kăp gĭt kơ Việt Nam truh asong jang tơ̆ Lào, tơgop kăp gĭt ăn tơdrong hơtŏk tơ-iung mŭk drăm – tơpôl kơ teh đak Lào.