Sơng Kơdră jang tang măt ăn teh đak Sri Lanka, Ƀok Tổng Bí thư, Kơdră teh đak bơ̆n lui ngeh hăm tơdrong hlôh vao kơ minh kơdră jang tơbôl păng hlôh vao kloh klĕch gah tơring, Kơdră jang tang măt gô đei lơ tơgop kăp gĭt ăn tơdrong hơtŏk jang tơbôl Việt Nam-Sri Lanka hơtŏk ‘lơ̆ng rŏ. Drơ̆ng nơ̆r hăm dôm sơkơ̆t gah trong jang hơtŏk tơbôl kơ 2 teh đak lơ̆m khei năr truh đơ̆ng Kơdră jang tang măt, Ƀok Tổng Bí thư, Kơdră teh đak bơ̆n akhan, kăl akŏm hơtŏk đon lui gah chĭnh trĭ; dôm tơdrong akŏm pơma đam đe kơdră kơpal.

Atŭm năr, sơng 14 Kơdră jang tang măt năm hmach păng pơtruh kơthơ pơm jang, Ƀok Tổng Bí thư, Kơdră teh đak bơ̆n Tô Lâm hơpơi ‘meh, rim kơdră jang tang măt lơ̆m jăl jang kơdih gô jang tơnăp sơnong “gơng tơroh” tơbôl jang hadoi, hơtŏk hloh dơ̆ng tơdrong jang tơbôl đơ̆ng Việt Nam păng rim teh đak mă rim Kơdră jang tang măt truh pơm jang; atŭm hăm noh sơkơ̆t, Việt Nam gô pơm trong hiôk vă rim Kơdră jang tang măt keh đang tơnăp sơnong jang po.