Ƀok Tổng Bí thư, Kơdră teh đak bơnê kơ tơdrong jang tơnăp đơ̆ng Anih jang tang măt hlôi jang đei lơ̆m pơm kiơ̆ sơnong jang mă Đảng, Jơnŭm pơgơ̆r teh đak pơjao, bơnê kơ tơdrong tơguăt tơguăl, tơnăp lơ̆m tơdrong jang, kiơ̆ đơ̆ng noh tơgop lơ̆m tơdrong hơtŏk tơ-iung kơ teh đak Cuba păng tơdrong tơbôl kơ 2 teh đak. Minh ‘măng dơ̆ng sơkơ̆t hơdah, tơdrong tơguăt tơguăl juăt jue, jang hadoi tôm tơdrong Việt Nam - Cuba hơnơ̆ng đei hơtŏk gah lơ tơdrong, Kơdră 2 Đảng, 2 teh đak lơ ‘măng sơkơ̆t hơdah, tơdrong jang tơbôl kơ 2 teh đak noh “hơdah hloh kơ 2 teh đak xah hô̆i chuh nghĩa”, “um pơtih kơ chăl hơrih”. 

Ƀok Tổng Bí thư, Kơdră teh đak bơ̆n ăn tơbăt, ‘măng năm tơmang teh đak Cuba ‘măng mă âu noh minh ‘măng sơkơ̆t hơdah Đảng, Jơnŭm pơgơ̆r teh đak păng kon pơlei Việt Nam lăng tơgĭt tơdrong tơbôl juăt jue tơguăt tơguăl păng tơbôl kăp gĭt kơ 2 Đảng, 2 teh đak păng 2 hơdrung hơdrĕch, hơpơi ‘meh hơtŏk pran păng hơtŏk tơdrong jang tơbôl Việt Nam - Cuba lơ̆m jăl jang ‘nao.