Ƀok Tổng Bí thư Nguyễn Phú Trọng hmach bơnê kơ tơdrong tơgŭm đơ̆ng Đảng, Jơnŭm pơgơ̆r teh đak păng kon pơlei Trung Quốc hăm Việt Nam lơ̆m tơdrong iung tơjră vă iŏk tơdrong rơngei hiôk hian adrol ki păng pơjing chu nghĩa xăh hô̆i hrei âu. Bơnê kơ tơdrong mă Đảng ƀô̆, jơnŭm pơgơ̆r tơring păng kon pơlei Quảng Tây lơ xơnăm kơ âu hơnơ̆ng tơrĕk vei lăng dôm anih gru grua đei tơrĕk truh Ƀok Kơdră Hồ Chí Minh păng kăch mang Việt Nam tơ̆ Quảng Tây. Ƀok Tổng Bí thư Nguyễn Phú Trọng chơt hơ-iă găh dôm tơdrong hơtŏk 'nao lơ̆m tơbôl jang hadoi đơ̆ng Quảng Tây păng dôm tơring xơlam teh kơ Việt Nam hlôi đei dôm hơyak hơtŏk tơ-iung 'lơ̆ng rŏ; pơkăl Quảng Tây păng dôm dêh char xơlam teh kơ Việt Nam yuk hơlâu păng chĕp vei đon bơnôh pơm jang tơnăp lơ̆m jang hadoi găh mŭk drăm – tĕch pơdro, tơlĕch jang hadoi găh tơmang pơhiơ̆, vei xơđơ̆ng tơpôl teh đak, akŏm tơroh kon pơlei, atŭm băl pơjing trong xơlam teh rơngei hiôk hian tơbôl.