Tơ̆ jơ pơma đam, Ƀok Tổng Bí thư sơkơ̆t hơdah, Đảng, Teh đak păng kon pơlei Việt Nam hơnơ̆ng tơƀlŏk tơdrong tơgŭm đơ̆ng Thươ̆ng viê̆n, Kuôk hô̆i, Jơnŭm pơgơ̆r teh đak, khul linh păng kon pơlei Campuchia hăm kon pơlei Việt Nam lơ̆m tơdrong iung tơjră pơrơngei hơdrung hơdrĕch hơdrol ki păng tơ-iung pơjing teh đak hrei âu; ră hơdah Đảng, Teh đak Việt Nam hơnơ̆ng lăng tơgĭt păng jang hơdrol ăn tơdrong hơtŏk tơbôl kơ 2 teh đak, hơnơ̆ng hơtŏk tơ-iung 'lơ̆ng rŏ.

Ƀok pơtao Norodom Sihamoni sô̆ hơ-iă hăm tơdrong jang đei jơnei tih, kăp gĭt kơ kon pơlei Việt Nam hlôi đei jơnei lơ̆m tơdrong tơplih 'nao jang hơtŏk tơ-iung teh đak, lui ngeh hăm tơdrong pơgơ̆r đơ̆ng Đảng Cộng sản Việt Nam, chĕp kơ̆l noh ƀok Tổng Bí thư Tô Lâm, kon pơlei Việt Nam gô pơtoi jang đei jơnei 'nao, tih tên hloh, pơm kiơ̆ tơchơ̆t mă Đảng tơlĕch, tơgop hơtŏk tơ-iung hơtŭm kơ tơring păng lơ̆m apŭng plenh teh. Ƀok pơtao teh đak Campuchia sơkơ̆t hơpơi 'meh păng khŏm pơm jang hadoi đơ̆ng rim Kơdră kơpal păng kon pơlei Campuchia pơtoi hơtŏk 'lơ̆ng ăn tơdrong jang tơbôl kơ 2 teh đak.

Hơdrol kơ noh, đơ̆ng rŏng kơ lêh sơng tơ̆ Anih jang Kơdră, Ƀok Kơdră teh đak bơ̆n Lương Cường hlôi pơma đam hăm Ƀok Pơtao teh đak Campuchia.