‘Mi đunh pơm hơlih 1 păh taluy kơjung dang 15m lơ̆m tơring oei xa tơ̆ phường 3, plt Đà Lạt, dêh char Lâm Đồng. Khul kơdră tơring hlôi pôk rĭ 1,2 unh hnam kon pơlei lĕch đơ̆ng tơring krê hơmơt. Tơdrong pôk rĭ hnam đei Anih vei lăng kon pơlei phường 3, plt Đà Lạt bơ̆ jang hloi til pơgê ‘năr 05/9, hăm 5 unh hnam, 13 ‘nu bơngai, tơ̆ hẻm 23 trong An Bình.

Adrol kơ ‘nŏh, lơ̆m kơmăng 4/9, kon pơlei tơ̆ tơring kơtơ̆ng jơva đôh re păng ƀôh taluy kơjung dang 15m tơ̆ trong âu hơlih, hăm lơ teh, tơmo kơlơ̆p tĭt dur hnam ƀok Nguyễn Văn Phước (kơsô̆ 136 trong Hà Huy Tập). Ƀât đei tơdrong ‘nâu lơ̆m hnam đei 6 ‘nu bơngai, tôch pŭn ưh đei bu rơka, păng hlôi đei chông lĕch tơ̆ anih nai. Tơ̆ hơnăp tơdrong krê hơmơt yoa ƀơm ưh ‘lơ̆ng đơ̆ng ‘mi kial kơsô̆ 3, Khul kơdră tơring ‘nâu athei pô̆k rĭ 5 unh hnam, hăm 13 ‘nu bơngai lĕch đơ̆ng tơring teh hơlih năm oei pơgia tơ̆ anih sơđơ̆ng ‘lơ̆ng. Atŭm hăm ‘nŏh, văr dăng tơlei jŭm dăr anih krê hơmơt, vă vei lăng sơđơ̆ng ‘lơ̆ng tơmam drăm păng tơdrong arih kơ kon pơlei.