Đak krong Krông Nô thong ro găn xăh Quảng Phú, apŭng Krông Nô, dêh char Đăk Nông ƀôh lơ anih hơlih hli hlơt. Hăm tơdrong đei ƀôh âu, đơ̆ng blŭng khei 11/2022, jơnŭm pơgơ̆r apŭng Krông Nô hlôi đei hla bar pơtruh ăn dêh char Đăk Nông athei pơdơh tơdrong kôch chuơh tơ̆ dôm anih hơlih tơ̆ xăh Quảng Phú. Mă lei 5 khei kơ âu, apŭng adoi oei gô dêh char hơlen lăng hăm đei pơdơh dăh mă ưh. Lơ̆m kơplăh noh, thong đak krong âu đei duk thŏng vih vơ̆t rim năr kôch chuơh rim năr lơ̆m tơdrong pơngơ̆t kơ đon đơ̆ng kon pơlei ăh mă teh choh jang xa roi năr roi jroh tơ̆ đak krong.

Pơgê năr 4/3 păng kơsơ̆ năr 8/3, nhôn năm truh tơring kôch chuơh tơ̆ đak krong Krông Nô, thong ro găn xăh Quảng Phú, apŭng Krông Nô, dêh char Đăk Nông. Anih thong đak krong adrô̆ hloh 2km, đei 6 tong duk kôch chuơh hăm kơmăi đôh rơ-ông rơ-ang. Minh ƀar tong duk oei kôch chuơh  tơ̆ đak krong, chuơh hơnơ̆ng đei ƀôm hơtŏk tơ̆  duk. Tơ̆ anih đei Anih jang vei lăng kon pơlei dêh char Đăk Nông axong hla bar ăn dôm anih jang mŭk drăm kôch chuơh, lơ anih tŏk bŏk oei hơlih truh tơ̆ kông, pơm ăn um ai đak krong jing tơpĕ tơpŏ, mă lei duk adoi oei kôch chuơh rơ-ông rơ-ang. Minh ‘nu bơngai oei tơ̆ thôn Phú Lợi, xăh Quảng Phú pơngơ̆t kơ đon ăn tơbăt, tơdrong jang kôch chuơh lơ̆m dôm xơnăm kơ âu hlôi pơm ăn teh jih đak krong hơlih roi năr roi hli hlơt, pơm hiong lơ hơgăt teh choh pơtăm: “Lăng atŭm tơ̆ âu pơtơm ăh 5 jơ pơgê noh đe kôch chuơh bơih, đei xư kôch truh 6 -7 jơ kơmăng pơtơm pơdơh. Ƀôh bơ̆n noh đe xư veh tơ̆ ‘nguaih ƀiơ̆, oei ưh đei bơ̆n noh đe xư tơmơ̆t hloi đing kôch truh tơ̆ jih kông đak, noh hăp hơlih đĕch yơh. Ih ƀôh găh to to, dang ei hăp pơtoi đing bơih, tơpă lơ̆m 2 năr dơ̆ng noh rơvak teh ƀơ̆t doh gô hơlih đĭ đĕch. Jơnŭm pơgơ̆r tơring athei chă trong hơmet thoi yơ mă ƀlep, mưh lê̆ hơnơ̆ng thoi âu noh teh choh pơtăm ƀơm pơkrăm đĭ tơ̆ đak krong”

Ƀok Nguyễn Chung Huy, Kơdră Anih jang Mŭk cham char apŭng Krông Nô, dêh char Đăk Nông ăn tơbăt, tơdrong mă teh joh đak krong Krông Nô lơ̆m xăh Quảng Phú hơlih roi năr roi hli hlơt tơ̆ dôm anih jang mŭk drăm đei axong hla bar gơh kôch chuơh. Kiơ̆ chih hơlen ăh jê̆ đĭ xơnăm 2022, đei  28 unh hnam kon pơlei tơ̆ xăh Quảng Phú ƀơm răm găh teh choh jang, ‘long pơtăm kơyuơ đơ̆ng teh jih đak krong hơlih tơ̆ dôm thong đak axong hla bar ăn 3 anih jang mŭk drăm gơh kôch chuơh. Dôm unh hnam kon pơlei hlôi pơm hla bar pơtruh ăn Anih jang vei lăng kon pơlei xăh Quảng Phú păng dang ei jơnŭm pơgơ̆r tơring pơm kơdranh vă athei anih jang mŭk drăm drơ̆ng nơ̆r hrŭ jên hăm dôm unh hnam kon pơlei. Ƀok Nguyễn Chung Huy akhan, tơdrong jang kôch chuơh dang ei noh pơngơ̆t kơ đon, tơdrong hơlih pơm đei chă tơkêng tơhlâu tơnap tap. Ƀok Huy adoi xơkơ̆t, dôm thong đak krong đei Anih jang vei lăng kon pơlei dêh char Đăk Nông axong hla bar gơh kôch chuơh ăn dôm anih jang mŭk drăm ăh khei năr adrol ưh đei hơlih ôh. Kiơ̆ tơchơ̆t, anih jang mŭk drăm gơh kôch chuơh ataih đơ̆ng jih kông đak noh 20m, mă lei pơngơ̆t kơ đon ăh anih ưh đei pơkăp hơdăh ataih 20m hăm jih kông đak lơ̆m mă blŭng axong gơh kôch chuơh iŏk yua ăh blŭng đĕch dăh mă rim ‘măng kôch jang. Pơm ăn teh jih thong đak hơlih noh duk kôch chuơh roi mơ̆t jrŭ ăh jih kông đak krong hloh. Dang ei, minh ƀar anih teh jih đak krong hơlih truh dôm jĭt met, duk jang tŏk bŏk oei oei mơ̆t jrŭ truh jih đak krong adrol ki. Păng âu jing tơdrong pơkăp đơ̆ng lươ̆t hăm rim anih jang păng Anih jang vei lăng kon pơlei dêh char Đăk Nôh hơlen vă hơmet pơtrŏ: “Pơkăp hla bar axong gơh kôch đei xơkơ̆t noh ăh kơ̆l găh tu đak, ăh băh đak, ‘nguaih kơ noh kiơ̆ pơkăp kôch ataih đơ̆ng jih đak krong noh 20m. Tơdrong tơchơ̆t jang kôch chuơh thoi ăi, oei jih đak krong tơ̆ yơ noh jing kiơ̆ kơ khei năr, tŏk bŏk ƀơm tơhlăk ăh anih âu. Apŭng duh lơ ‘măng pơtrruh nơ̆r hơlen thoi yơ, pơkăp thoi yơ noh jih đak krong ăh khei năr xơkơ̆t axong hla bar pơm jang, mưh ăh teh jih đak krong hơlih bơih bu ƀôh ăn jih kông tơ̆ yơ jing minh tơdrong pơkăp găh khôi luơ̆t”

Atŭm hăm noh, tơdrong mă teh joh krong hơlih hli hlơt, khei 11/2022, Anih jang vei lăng kon pơlei apŭng Krông Nô hlôi đei hla bar pơkăp athei Anih jang vei lăng kon pơlei dêh char Đăk Nông pơdơh lê̆ tơdrong jang kôch chuơh tơ̆ dôm anih teh jih krong hơlih tơ̆ xăh Quảng Phú. Mă lei, apŭng oei gô dêh char đơ̆ng khei năr noh truh dang ei, lơ̆m kơplăh noh teh jih krong roi năr roi hơlih hli hloh dơ̆ng: “Hăm tơdrong mă teh hơlih rok kiơ̆ thong đak krong Krông Nô noh apŭng adoi pơtrruh nơ̆r, pơkăl dôm anih jang kôch chuơh dăh tenh kuăng chă hơmet pơ-‘lơ̆ng cham char lơ̆m tơdrong jang kôch chuơh vă pơtruh ăn dôm anih jang kơdră kơpal chă hơlen, xơkơ̆t păng tơnăp iŏk jang. Pơtruh nơ̆r hăm Anih jang găh Mŭk drăm Chamc har hơlen, xơkơ̆t tơdrong đei ƀôh pơm tơpĕ tơpŏ um ai đak krong. Pơkăl athei pơdơh kôch chuơh kiơ̆ nhen Tơchơ̆t 23 đơ̆ng Jơnŭm pơgơ̆r teh đak tơlĕch. Akhan noh kâ̆m tơdăng vă hơmet ming cham char, đơ̆ng rŏng kơ đang bơih noh kôch jang dơ̆ng. Apŭng pơtruh nơ̆r bơih, oei đe kơdră kơpal kơ dêh char tơchơ̆t thoi yơ, truh dang yơ đĕch”

Tơ̆ thong đak krong Krông Nô lơ̆m tơring teh kơ xăh Quảng Phú, apŭng Krông Nô, Anih jang Vei lăng kon pơlei dêh char Đăk Nông axong 4 hla bar axong jang kôch chuơh ăn 4 anih jang mŭk drăm noh: Kŏng ti iŏk jang mŭk drăm kăp gĭt Phước Lộc, Anih jang mŭk drăm Văn Hồng, Kŏng ti iŏk jang xir tơmo kăp gĭt Quảng Phú păng Kŏng ti Hải Khánh Ngân. Lơ̆m noh, Kŏng ti  Hải Khánh Ngân hlôi pơdơh pơm jang đơ̆ng khei 1/2022. 3 anih jang mŭk drăm nai oei pơm jang kơyuơ đei hla bar axong pơm jang hăm pơkăp iŏk yua pơhlom 68.000m3 1 xơnăm lơ̆m anih pơkăp ataih kơ thong đak krong noh 6,4km.

Hăm tơdrong mă teh jih đak krong hơlih roi năr roi hli tơ̆ xăh Quảng Phú, tơdrong pơdơh jang kôch chuơh vă pơm kiơ̆ dôm pơkăp tơlĕch vei lăng jih thong đak krong, hơmet ming cham char kiơ̆ Tơchơ̆t 23 đơ̆ng Jơnŭm pơgơ̆r teh đak tơlĕch păng kiơ̆ tơdrong pơkăl đơ̆ng apŭng Krông Nô noh trŏ tơpă. Anih jang vei lăng kon pơlei dêh char Đăk Nông kăl dăh hrôih tơlĕch tơchơ̆t, tang găn tơdrong đei ƀôh teh jih đak krong hơlih hơnơ̆ng, pơrăm truh tơ̆ đak krong Krông Nô adoi nhen pơm hiong teh choh pơtăm kơ kon pơlei.