Pơgê năr 10/3, Hơnih tơm vei lăng Chŏh jang sa păng Atŏk tơ iung tơring tơrang iung jang hơdoi hăm Hơnih vei lăng kon pơlei dêh char Đak lăk pơgơ̆r et hơtŏk pơnơ̆t đak hlŏh 1.600 ti hlak jên-Pơnơ̆t dơnau đak Ea Hleo 1, ‘nau hơnih jang gĭt kăl hlŏh hăm groi teh kơƀah kơđak apŭng Ea H’leo. Kơ iĕng Thủ tướng Trần Lưu Quang vang năm kơtĭt kơnŭt et hơtŏk hơnih jang.  

Tơdrong vă jang Dơnau đak Ea Hleo 1 đei Hơnih tơm vei lăng Chŏh jang sa păng Atŏk tơ iung tơring tơrang kĭ pơkăp tơmơ̆t jên jang ming man lơ̆m sơnăm 2017, hăm mong đak đei 26 triu m3. ‘Nau hơnih jang mă blŭng lơ̆m dêh char Đak lăk păng tơring Tây Nguyên đei pơnơ̆t bơ̆ đak kroong pơjing đei jing dơnau mong đak să hlŏh. Dơnau đak au gô chă pơchoh đak kroong Ea H’leo tơgŭm ăn pơro tơruih ‘long pơtăm jang sa sơđơ̆ng kơ tơring; pơtruh đak sŏ nhă, rong kon tơrong, hơnih jang kmăi kmŏk pơm tơlĕch tơmam drăm, tơmang pơhiơ̆ ... tơgop hơmet pơ ‘lơ̆ng tơdrong choh jang sa kiơ̆ iŏk yua kơjăp păng atŏk tơ iung kơtang, pơjing đei tơdrong erih sa ăn kon pơlei roi năr roi sơđơ̆ng. Kiơ̆ pơlăp, mưh iŏk jang hơnih au gô pơtruh đak chă tơruih pơro ăn 5.000ha teh chŏh jang sa, pơjing đei đak sŏ nhă ăn dang 15.000 ‘nu kon pơlei lơ̆m tơring.