Lơm dêh char dang ei đei hloh 3.000 tong duk rôp ka hơdang hăm 12.500 ‘nu bơngai jang rôp ka hơdang. Lơ̆m ou dang 500 tong duk hăm 2.800 ‘nu bơngai jang tŏk bŏk năm rôp ka hơdang tơ̆ đak dơsĭ; pă dôm yơ duk hlôi dơ̆ng tơ̆ jih. Hơlen kiơ̆ tơring, đei 424 tong duk rôp ka hơdang tơ̆ tơring đak dơsĭ Quảng Ngãi – Pơlei tơm Hồ Chí Minh; 24 tong duk rôp ka hơdang tơ̆ tơring đak dơsĭ Đồng Tháp – An Giang; 70 tong duk tơ̆ tơring đak dơsĭ achon dơsĭ Trường Sa. Đĭ đăng dôm duk rôp ka hơdang ou hlôi ba mơ̆t dơ̆ng tơ̆ hơnih sơđơ̆ng; kơhrĕng hơdrŭng rong ka đei hơmet ming pơ ‘lơ̆ng. Kmăi kmŏk pơma dơnuh tơbăt dih băl bơ̆ jang hơnơ̆ng, sơđơ̆ng tơtom tơroi tơbăt ăn kơdră kơpal păng iung jang hơdoi kơjăp hăm khul kơdră tơring, khul bơ̆ jang lơ̆m tơdrong hơmet pơ ‘lơ̆ng tơdăh đei tơdrong ou to.

‘Năr 25/8, Ƀô̆ đô̆i tơring sơlam dêh char Gia Lai hlôi krao hơvơn 3.397 tong duk hăm hloh 23.100 ‘nu kon pơlei jang ka tŏk tơ̆ kông veh kơ ‘nơp sơđơ̆ng hơdrol kơ ‘Mi kial hơbŭt kơsô̆ 5 (kial hơbŭt Kajiki). Vă tang găn ‘Mi kial hơbŭt kơsô̆ 5, Khŭl pơgơ̆ ƀô̆ đô̆i tơring sơlam dêh char Gia Lai hlôi tơlĕch ăn 3 hla ar kăl, athei dôm anih jang hơtŏk loi dơ̆ng răp hơlen, chă lăng tơdrong ‘mi kial tơ̆ tơring sơlam păng tơring đak dơsĭ; hơdai hăm roi tơbăt, pơtho dôm duk thŏng an băt hơnih, trong tak đơ̆ng kial hơbŭt vă kơ chăng tang găn, năm lĕch dăh mă ưh kơ năm mơ̆t lơ̆m tơring krê hơmơt.

Khŭl lĭnh tơring sơlam hlôi pơtho 626 tong duk hăm 5.147 ‘nu kon pơlei jang ka dơ̆ng tơ̆ dôm hơnih sơđơ̆ng; hơdai hăm krao hơvơn đei 3.397 tong duk hăm 23.104 ‘nu kon pơlei jang ka tŏk tơ̆ kông veh ver kơ kial hơbŭt.