Lơ̆m mir pơgar să 7 sao tơ̆ pơlei Đồng Giao, tơring Ea M’Droh (Dak Lăk), klo hơnăn ‘nhŏng Lý Thanh Tiền (hơdrung Dao) hơngŭr tŏk bŏk chơ choh ‘ngiĕt tuh hrou hăm đơ̆k chă hiĕm mơjit tŏ rơmo sa. ‘Nhŏng tơroi, dôm rơmo ou đei đơ̆ng ƀar tŏ rơmo yŏng nă dêh char tơgŭm ăn lơ̆m sơnăm 2021. Gơnơm chă rong kon tơrong atŭm hăm choh jang sa, ŭnh hnam ‘nhŏng mă yak hloh dơnuh hin, tơ iung pơjing đei hnam ‘lơ̆ng, vei lăng năng tông ăn kon hơ ‘lơ̆p hŏk pơhrăm. “Sơ̆ ŭnh hnam nhôn ‘noh ŭnh hnam dơnuh, đei Teh đak tơgŭm ăn rơmo yŏng hăm pơbe yŏng, ‘ngoaih kơ ‘noh oei chă pơtho ăn kih thuơ̆t rong kon tơrong, choh jang sa vă ŭnh hnam jang sa sơđơ̆ng ƀiơ̆. Dang ei ŭnh hnam hlôi yak hloh dơnuh. Nhôn hơpơi ‘meh vă Đang ƀô̆ dêh char Dak Lăk jăl jang truh ou kơnh hơnơ̆ng tơgŭm djru rim tơdrong jang tơjur dơnuh vă kon pơlei lơ̆m pơlei đei rơvơn hơdrin jang sa kĕ yak hloh dơnuh hin, sơđơ̆ng hơrih sa.”

Tơ̆ buôn Cuôr, tơring Ea M’Droh, pơlei nhen lĕ ngăl bơngai Êđê, ƀok Y Sắk Kbuôr, Thôn trơng tơbăt, gơnơm tơdrong lăng ba đơ̆ng Đảng păng Teh đak, tơlei ŭnh hơyuh, đak sŏ nhă rơgoh, trong nơnăm, hnam trương hŏk păng hnam pơgang hlôi đei tơmơ̆t jang tôm. Đơ̆ng dôm tơdrong jang tơjur dơnuh, hloh 120 ŭnh hnam đei tơgŭm ăn hnam oei, hơdrĕch dơđăh ‘long pơtăm, kon tơrong atŏk tơ iung mŭk drăm sơđơ̆ng hơrih sa. Hrei ou pơlei đei 40 ŭnh hnam dơnuh, tơmơ̆t dang 12%. Ƀok Y Săk tơbăt.“Nhôn jei hơpơi kơdră chĕp pơgơ̆r dêh char hơnơ̆ng lăng ba tơmơ̆t jên jang tơgum djru ăn dôm ŭnh hnam uơ oei găh hơdrĕch dơđăh ‘long pơtăm, yŏng kon tơrong vă kon pơlei đei rơvơn kĕ yak hloh dơnuh hin” 

Đơ̆ng rŏng hơgrop atŭm hăm Phú Yên, Dak Lăk hrei ou đei 3 triu 340.000 ‘nu măt bơngai, lơ̆m ou 1/4 măt bơngai ‘noh kon kông. Kră pơlei Y Jiê Niê, oei tơ̆ tơring Ea M’Droh tơbăt, trong jang tơgŭm djru kon kông lơ̆m jăl jang ou ki hlôi đei dêh char Dak Lăk iung jang ‘lơ̆ng. Pơlei pơla roi năr roi tơplih ‘nao. Chă lăng hơnơ̆ng ‘măng pơgơ̆r Hop akŏm tih Đang ƀô̆ dêh char, ƀok Y Jiê hơmŏ: “Kon pơlei hơpơi Đang ƀô̆ dêh char rơih đei dôm bơngai hơgei đei jơhngơ̆m đon ‘lơ̆ng vă chĕp pơgơ̆r dêh char hơnhăk mŭk drăm pơdrŏng hloh dơ̆ng, tơdrong hơrih sa kơ kon pơlei phĭ tơtŏ dơnŏ ‘lơ̆ng dơ̆ng kơjăp. Kon pơlei lơ̆m dêh char gô đei tơgŭm djru tơ iung pơjing dơ̆ng trong nơnăm, pơnơ̆t đak, hnam trương hŏk vă kôn mon kon sou đei hŏk pơhrăm tôm păng đei tơdrong jang sơđơ̆ng”.

Jăl jang 2020 – 2025, dêh char Dak Lăk hlôi tơlĕch lơ tơdrong jang, tơdrong vă jang tơjur dơnuh hin tơring kon kông hăm kon jên jang hloh 4.220 ti hlak jên. 1.866 ŭnh hnam đei tơgŭm ăn hnam oei, 5.228 ŭnh hnam đei tơgŭm ăn tơdrong jang sa, ŭnh hnam dơnuh tơjur hơnơ̆ng kiơ̆ sơnăm păng truh hơtuch sơnăm 2025 lê̆ pă hloh 10%.

Ƀok Võ Trần Quang, Kơ iĕng Kơdră Hơnih jang Pơtho tơbăt păng Pơrô̆ pơrôp dêh char Dak Lăk tơbăt, Tơdrong tơchơ̆t Hop akŏm tih Đang ƀô̆ dêh char jăl 2025 - 2030 tơlĕch ăn lơ tơdrong jang kăl găh atŏk tơ iung mŭk drăm-tơpôl, adoi hơnơ̆ng iung jang rim tơdrong jang tơjur dơnuh, mă kăl ‘noh tơring kon kông. “Đang ƀô̆ dêh char sơkơ̆t hơdăh tơdrong jang tơm găh tơdrong lăng ba tơmơ̆t jên jang păng jang kiơ̆ jơnei rim tơdrong jang tơgum djru kon kông lơ̆m jăl jang ou lơ̆m dêh char. Lơ̆m ou, hơdrin tơjur 2% ŭnh hnam dơnuh lơ̆m dêh char păng tơjur 3% truh tơ̆ lơ lơ̆m tơring kon kông.”

Kon pơlei rim hơdrung oei lơ̆m dêh char Dak Lăk lui kơjăp, hơmŏ kơtang đơ̆ng Hop akom tih Đang ƀô̆ dêh char jăl mă blŭng jăl jang 2025 - 2030, dêh char gô đei hơyak atŏk tơ iung kơtang, tơdrong hơrih sa kơ kon pơlei gô hơnơ̆ng tơplih ‘nao pran kơtang hloh dơ̆ng.