Lơ̆m nŏh đei tơdrong pơtho tơƀôh ming, hơlen năng tơdrong hŏk pơhrăm đơ̆ng hŏk tro vă ôn ming ƀai ăn hŏk tro. Kiơ̆ nơ̆r hơgăt đơ̆ng Anih tơm vei lăng pơtho pơhrăm, ‘măng thi tốt nghiệp THPT sơnăm 2023 vă pơgơ̆r lơ̆m 2 năr ‘nŏh ‘năr 28-29/6. Sơnăm ‘nâu, dêh char Dak Lak đei hlŏh 20.000 ‘nu hŏk tro chih măt thi tơ̆ 32 anih thi tơ̆ 15 apŭng, thĭ xăh, plt lơ̆m dêh char.

Ƀok Phạm Đăng Khoa, Kơdră vei lăng pơtho pơhrăm dêh char Dak Lak ăn tơbăt: ‘Măng thi sơnăm ‘nâu, Anih tơm vei lăng pơtho pơhrăm hơnơ̆ng pơjao ăn dôm tơring chĭu pŭ găh tơdrong pơgơ̆r thi. Yoa thoi nŏh, Anih vei lăng pơtho pơhrăm dêh char Dak Lak hlôi kơchăng tơlĕch trong jang đơ̆ng hrôih. Truh dang ei, tơdrong hơmet ăn ‘măng thi tốt nghiệp THPT sơnăm 2023 tŏk bŏk tơlĕch jang lăp hăm tơdrong hơgăt.