Lơ̆m khei 8, jơ̆p dêh char ƀôh đei 85 unh hnam rong nhŭng ƀơm pơrang jĭ klak nhŭng châu Phi, athei soh lê̆ hloh 1.100 tŏ. Jô̆ đơ̆ng blŭng sơnăm truh dang ei, jĭ klak chroh nhŭng châu Phi hlôi ƀôh tơ̆ 35 xah, phương, pơm ăn hloh 2.500 tŏ nhŭng ƀơm soh lê̆. Dang ei oei đei 27 xah, phương đei nhŭng ƀơm pơrang jĭ tam mă hloh 21 năr.

Atŭm hăm pơrang jĭ klak chroh nhŭng châu Phi, dôm pơrang jĭ tơpoh hli hlơt nai nhen rơka ƀơ̆r tơplŏ kơchôp, jĭ pơplei hơkar mă tam đei ƀôh lơ̆m khei, chŏng mă tơdrong hơbbuh pơrang adoi hli. Tơdrong tơm noh kơyuơ virus oei đunh lơ̆m cham char, tơdrong tơpoh hli hlơt; lơ̆m kơplah noh unh hnam jang rong kon tơrong noh lơ, tơdrong sơđơ̆ng ưh đei tơnăp. Atŭm hăm noh, tŏ 'mi kial ưh đei sơđơ̆ng păng ưh kơ mah pơgang hơmet pơrang pơm ăn tơdrong hơlen pơrang ưh đei tơnăp.