Kang ƀô̆ hơmet jĭ kon tơrong tơ̆ xăh truh tơ̆ hnam kon pơlei ƀet vaccine bơ̆ng jĭ vơnh ăn kơ kŏ

Khul kŏ unh hnam ‘nhŏng Y Bruat Niê, tơ̆ pơlei Ea Phê, xăh Ea Phê, apŭng Krông Pách rong hloh 3 xơnăm mă lei tam mă minh ‘măng ƀet pơgang bơ̆ng jĭ. ‘Nhŏng ăn tơbăt, kơlih kŏ rong hơchăng hlôi đunh, ‘nhŏng hli kơ kŏ kăp ƀơ̆t chă rôp: “Đơ̆ng đunh ưh đei ƀet pơgang, ƀar tŏ yŏng khĕnh noh ưh kơ khĭn rôp, hli kơ hăp kăp, noh ưh gơh chă ƀet pơgang. Hli hlơt kơlih kŏ kăp noh đei pơnhŭl, mưh ưh năm tơ̆ hnam pơgang noh lôch đĕch”

Kơtơ̆ng tơroi lơ̆m aloa pơre nơ̆r kơ xăh găh khei năr ƀet pơgang bơ̆ng jĭ ăn kŏ meo, unh hnam Ngô Quốc Đạt, tơ̆ xăh Ea Kuăng, apŭng Krông Pách, dêh char Đăk Lăk hlôi rơtăp tơdrong jang vă oei tơ̆ hnam gô kang ƀô̆ hơmet jĭ ăn kon tơrong truh ƀet pơgang bơ̆ng jĭ vơnh ăn 3 tŏ kŏ kơ unh hnam. ‘Nhŏng ăn tơbăt, tơ̆ âu nhen lĕ hnam mă yơ adoi rong kŏ rong meo, mă lăi ưh đei bu kơdih ‘nhăk kon tơrong năm ƀet bơ̆ng jĭ vơnh, mă hơnơ̆ng gô đei ‘măng truh ƀet kiơ̆ pơkăp đơ̆ng kơpal đĕch: “Adoi băt hơdăh jĭ vơnh noh hli hlơt, mưh ƀet pơgang bơ̆ng jĭ vơnh adoi ‘lơ̆ng, mưh mă đei đe vih ƀet tơ̆ hnam noh inh kơchăng chă ƀet ăn kơ kŏ. Mưh đei pơgang ƀet bơ̆ng noh ‘lơ̆ng mơ̆n, ba bơ̆ng jĭ ăn kơ hăp, mưh đei tơdrong kiơ noh adoi da ƀiơ̆”

Apŭng Krông Pách đei hloh 10.000 unh hnam rong kŏ hăm hloh 15.000 tŏ. Mă thoi noh, xơnăm 2022 anih jang găh tơdrong jĭ kon tơrong adrô̆ tơlĕch chă ƀet bơ̆ng jĭ ăn 3.800 tŏ đĕch. Kiơ̆ kơ ƀok Võ Văn Vàng – Anih jang Rong kon tơrong păng Hơmet jĭ ăn kon tơrong apŭng Krông Pách, tơnap tap hloh noh ưh đei tơdrong vang jang đơ̆ng bơngai rong kŏ: “Kăp gĭt hloh dang ei noh tơdrong kơchăng đơ̆ng bơngai rong kon tơrong. Tơpă băt hơdăh găh ƀet pơgang bơ̆ng jĭ vơnh noh ‘lơ̆ng. Mă lei dang ei kon pơlei adoi oei pơhơi hăm tơdrong ƀet pơgang bơ̆ng jĭ vơnh âu. Lơ ‘măng kon pơlei đei tơdrong pơm ưh kơ ‘lơ̆ng hăm bơngai chă năm ƀet bơ̆ng jĭ, pơtih nhen ăh mă bơngai jang hơmet jĭ ăn kon tơrong truh ƀet pơgang noh kon pơlei akhan, kŏ noh, rôp đei noh ƀet văi”

Kiơ̆ chih hơlen đơ̆ng Anih jang Choh pơtăm păng Hơtŏk tơring pơxĕl, đơ̆ng xơnăm 2018 truh xơnăm 2022, Đăk Lăk hlôi chih đei 25 ‘nu bơngai lôch kơyuơ jĭ vơnh. Lơ̆m noh, đei dôm bơngai hơbuh jĭ đunh năr, ƀơm kŏ kăp đơ̆ng 4 khei truh 1 xơnăm đơ̆ng rŏng kơ noh pơtơm ƀơm jĭ. Tôm bơngai lôch noh ưh đei năm ƀet bơ̆ng jĭ đơ̆ng rŏng kơ kŏ meo kăp kach.

Mă rim xơnăm adoi băt đei bơngai lôch kơyuơ jĭ vơnh, chŏng mă tơdrong jang ƀet vaccine bơ̆ng jĭ vơnh ăn kon tơrong tơ̆ Đăk Lăk đei 30% đĕch lơ̆m kơsô̆ 360 rơbâu tŏ kŏ meo. Dang ei Đăk Lăk tŏk bŏk oei tơlĕch ƀet vaccine bơ̆ng jĭ vơnh ăn kơ kŏ meo lơ̆m jâ̆p dêh char đơ̆ng năr 25/3-25/4. Kiơ̆ kơ noh, rim unh hnam kon pơlei kon kông, unh hnam mă teh đak tơchơ̆t tơgŭm, unh hnam hin dơnuh ưh đei kla jên ƀet pơgang ăn kŏ meo. Dôm bơngai nai noh kla  22.100 hlj ăn 1 kơliu ƀet bơ̆ng.